കാഞ്ഞങ്ങാട്: ഇന്നലെ മത്സ്യമാര്‍ക്കറ്റില്‍ ജില്ലാ ഭരണകൂടവുമായി സഹകരിച്ചു നഗരസഭ നടത്തിയ ശുചീകരണ പ്രവൃത്തിക്കിടയില്‍ മത്സ്യത്തൊഴിലാളികളുടെ പക്കലുണ്ടായിരുന്ന പുതിയ ഐസിട്ട മത്സ്യം കുഴിച്ചു മൂടിയതായി ആക്ഷേപം. ഇതിനെ തുടര്‍ന്ന് മത്സ്യത്തൊഴിലാളികള്‍ പ്രതിഷേധമുയര്‍ത്തിയതിനെ തുടര്‍ന്ന് സ്ഥലത്ത് പൊലിസ് എത്തി. നഗരസഭ അധികൃതര്‍ മത്സ്യമാര്‍ക്കറ്റ് ശുചീകരിച്ചു പോയതിനു ശേഷമാണു മത്സ്യത്തൊഴിലാളികള്‍ ആക്ഷേപമുന്നയിച്ചത്.
സമീപത്തെ കല്ല്യാണ വീട്ടിലേക്കു കൊണ്ടുവന്ന 22 കിലോ ഭാരമുള്ള സ്രാവിനെയാണു നഗരസഭാ അധികൃതര്‍ കുഴിച്ചു മൂടിയതെന്നാണ് ആരോപണം. എന്നാല്‍, സ്രാവ് ഇട്ടു വച്ച പെട്ടിയ്ക്കു കീഴില്‍ കൊതുകിന്റെ പ്രജനനം കണ്ടതിനെ തുടര്‍ന്നാണ് മത്സ്യം നശിപ്പിക്കാന്‍ തയാറായതെന്ന് നഗരസഭാ അധികൃതര്‍ പറഞ്ഞു. ഇന്നലെ നടന്ന കല്യാണത്തിനായി കഴിഞ്ഞ ദിവസമാണ് സ്രാവിനെ എത്തിച്ചതെന്നും മോശമായിട്ടില്ലെന്നും മത്സ്യത്തൊഴിലാളികള്‍ പറഞ്ഞു. സ്രാവിനെ നശിപ്പിച്ചതിനു പകരമായി നഷ്ടപരിഹാരം നല്‍കാമെന്ന് നഗരസഭാ അധികൃതര്‍ പറഞ്ഞാണ് പ്രശ്‌നം പരിഹരിച്ചത്.