ബദിയടുക്ക: ബൈക്കില്‍ സഞ്ചരിക്കുകയായിരുന്ന പ്രായപൂര്‍ത്തിയാകാത്ത കമിതാക്കളെ പൊലിസ് പിടികൂടി. കഴിഞ്ഞ ദിവസം രാത്രി 12 ഓടെ വാഹന പരിശോധനക്കിടെ നെല്ലിക്കട്ടയില്‍ വച്ചാണ് ബൈക്കില്‍ സഞ്ചരിക്കുകയായിരുന്ന ഇവരെ പിടികൂടിയത്. മധുരിനു സമീപം കൊല്യയിലെ പതിനേഴുകാരനും അയല്‍വാസിയായ പതിനാറുകാരിയുമാണു പൊലിസ് പിടിയിലായത്.
പൊലിസ് ചോദ്യം ചെയ്തപ്പോള്‍ പരസ്പര വിരുദ്ധമായ മറുപടി പറഞ്ഞതിനെ തുടര്‍ന്ന് ഇരുവരെയും പൊലിസ് സ്റ്റേഷനില്‍ കൊണ്ട് വന്നു ചോദ്യം ചെയ്തപ്പോള്‍ ഇരുവരും പ്രണയത്തിലാണെന്നും നാടു വിടാന്‍ ശ്രമിച്ചതാണെന്നും പൊലിസിനോട് പറഞ്ഞു. ശേഷം പെണ്‍കുട്ടിയുടെ വീട്ടുകാരെ വിവരമറിയിച്ചു. സ്റ്റേഷനിലെത്തിയ ബന്ധുക്കളോടൊപ്പം പെണ്‍കുട്ടിയെ വിട്ടയച്ചു.
ആണ്‍കുട്ടിയുടെ വീട്ടുകാരെ വിവരം അറിയിച്ചിട്ടുണ്ടെന്നും ആരെങ്കിലും പരാതി നല്‍കിയാല്‍ കേസെടുക്കുമെന്നും അല്ലാത്ത പക്ഷം ബൈക്കിന്റെ ആര്‍.സി ഉടമക്കെതിരേ കേസെടുക്കുമെന്നും ബദിയടുക്ക എസ്.ഐ കെ.ആര്‍ അമ്പാടി പറഞ്ഞു.