കല്‍പ്പറ്റ: അമ്പലവയലില്‍ നടുറോഡില്‍ ദമ്പതികളെ ക്രൂരമായി മര്‍ദിച്ച സംഭവത്തില്‍ വനിതാ കമ്മിഷന്‍ സ്വമേധയാ കേസെടുത്തു. പൊലിസ് സ്റ്റേഷന്റെ മൂക്കിനു താഴെ നിരവധിപേര്‍ ദൃക്സാക്ഷികളുണ്ടായിട്ടും സംഭവത്തില്‍ പൊലിസ് കേസെടുക്കാതെ വിട്ടയച്ച നടപടിയെയും വനിതാകമ്മിഷന്‍ ചെയര്‍പേഴ്‌സണ്‍ എം.സി. ജോസഫൈന്‍ വിമര്‍ശിച്ചു. പൊലിസ് സ്റ്റേഷനു 20 മീറ്റര്‍ അകലെയാണ് ഈ സംഭവം അരങ്ങേറിയത്.
പരാതിയില്ലെന്ന കാരണത്താല്‍ കേസെടുക്കാതെ വിട്ടയച്ച നടപടിയാണ് കമ്മിഷനെ ചൊടിപ്പിച്ചത്. മര്‍ദനത്തിനിരയായ ദമ്പതികളെ എത്രയും പെട്ടെന്ന് കണ്ടെത്തണമെന്നും അക്രമിയെ അറസ്റ്റ് ചെയ്യണമെന്നും അവര്‍ ആവശ്യപ്പെട്ടു. സ്ഥലം കാണാനെത്തിയ ദമ്പതികളെയാണ് ജീവാനന്ദന്‍ എന്ന ഓട്ടോ ഡ്രൈവര്‍ ക്രൂരമായി മര്‍ദിച്ചത്. ആദ്യം ഇവരെ സ്റ്റേഷനിലേക്ക് വിളിപ്പിച്ച് ചെറിയ പിഴ ഈടാക്കി പരാതിക്കാരെയും പ്രതിയെയും പൊലിസ് പറഞ്ഞുവിടുകയായിരുന്നുവെത്രെ
എന്നാല്‍ പരാതി നല്‍കാന്‍ ദമ്പതികള്‍ തയാറാകാത്തതിനെ തുടര്‍ന്ന് കേസ് ഒതുക്കി തീര്‍ക്കുകയാണ് പൊലിസ് ചെയ്തതെന്നും ആക്ഷേപമുണ്ട്. ദമ്പതികളെ മര്‍ദിക്കുന്നതിന്റെ ദൃശ്യങ്ങള്‍ സാമൂഹ്യമാധ്യമങ്ങളില്‍ വ്യാപകമായി പ്രചരിച്ചതോടെ സംഭവത്തില്‍ ജില്ലാ പൊലിസ് മേധാവി അന്വേഷണത്തിന് ഉത്തരവിട്ടിരുന്നു.
ഇതോടെയാണ് പൊലിസ് നടപടി എടുത്തത്.
അമ്പലവയലില്‍ കഴിഞ്ഞ ഞായറാഴ്ചയായിരുന്നു സംഭവം. ഭര്‍ത്താവിനെ മര്‍ദിച്ചത് ചോദ്യം ചെയ്തതിനെ തുടര്‍ന്ന് ജീവാനന്ദന്‍ യുവതിയെ ക്രൂരമായി മര്‍ദിക്കുകയും അസഭ്യവര്‍ഷം ചൊരിയുകയും ചെയ്യുന്നുണ്ട്.