ചെറുവത്തൂര്‍: മികച്ച അല്‍ബിര്‍റ് പ്രീ സ്‌കൂളുകള്‍ക്ക് അല്‍ബിര്‍റ് ഇസ്‌ലാമിക് പ്രീ സ്‌കൂള്‍ സംസ്ഥാന സമിതി എര്‍പ്പെടുത്തിയ പ്രഥമ കോട്ടുമല ബാപ്പു മുസ്‌ലിയാര്‍ അവാര്‍ഡ് കാടങ്കോട് എജ്യുക്കേഷണല്‍ ട്രസ്റ്റിന്റെ കീഴില്‍ നടത്തപ്പെടുന്ന കെറ്റ് അല്‍ബിര്‍റ് ഇസ്‌ലാമിക് പ്രീ സ്‌കൂള്‍ കരസ്ഥമാക്കി. എടച്ചാക്കൈ അല്‍ബിര്‍റ് രണ്ടാംസ്ഥാനം നേടി. കുട്ടികളുടെ പഠന-പാഠ്യേതര പ്രവര്‍ത്തനങ്ങളിലെ മികവ്, മറ്റുസൗകര്യങ്ങള്‍ തുടങ്ങിയ 33 മാനദണ്ഡങ്ങളാണ് അവാര്‍ഡിനായി പരിഗണിച്ചത്.
കോഴിക്കോട് സമസ്ത ഓഡിറ്റോറിയത്തില്‍ നടന്ന അവാര്‍ഡ് ദാന ചടങ്ങില്‍ സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങളില്‍ നിന്നു കാടങ്കോടും എടച്ചാക്കൈയും അവാര്‍ഡ് ഏറ്റുവാങ്ങി. കെറ്റ് അല്‍ബിര്‍റ് ഇസ്‌ലാമിക് പ്രീസ് കൂള്‍ മാനേജ്‌മെന്റ് പ്രതിനിധികളായ ടി. അബ്ദുല്‍ ഹാശിം, മുഹമ്മദ് അഫ്‌സല്‍ ഹുദവി എന്നിവര്‍ അവാര്‍ഡ് സ്വീകരിച്ചു.
കെറ്റ് അല്‍ബിര്‍റ് അധ്യാപികമാരായ റസീന എന്‍. കരിവെള്ളൂര്‍, ഫാത്തിമ എം. മാവിലക്കടപ്പുറം എന്നിവര്‍ ബെസ്റ്റ് പെര്‍ഫോമന്‍സ് അവാര്‍ഡും കരസ്ഥമാക്കി. അല്‍അമീന്‍ ചാരിറ്റബിള്‍ ട്രസ്റ്റ് ജനറല്‍ സെക്രട്ടറി എം.സി ഖമറുദ്ദീന്‍, ട്രസ്റ്റി കെ. അബ്ദുല്‍ നാസര്‍ എന്നിവര്‍ എടച്ചാക്കൈക്കു വേണ്ടി അവാര്‍ഡ് ഏറ്റുവാങ്ങി.