കല്‍പ്പറ്റ: മോദി ഭരണത്തില്‍ രാജ്യത്തെ സര്‍വമേഖലയും തകര്‍ന്നതായി ഐ.എന്‍.ടി.യു.സി സംസ്ഥാന പ്രസിഡന്റ് ആര്‍. ചന്ദ്രശേഖരന്‍. സാമ്പത്തികമേഖല പൂര്‍ണമായി തകര്‍ന്നതോടെ തൊഴിലാളികളുടെ ജീവിതം കടുത്ത പ്രതിസന്ധിയിലാണ്. ഈ സാഹചര്യത്തില്‍ ജനുവരി എട്ട്, ഒന്‍പത് തിയതികളില്‍ സംയുക്ത തൊഴിലാളി യൂനിയനുകളുടെ നേതൃത്വത്തില്‍ ദേശീയ പണിമുടക്ക് നടത്താന്‍ തീരുമാനിച്ചിട്ടുണ്ട്. റെയില്‍വേ, വ്യോമയാന മേഖലയടക്കം പണിമുടക്കിന്റെ ഭാഗമാകുന്നതോടെ രാജ്യം നിശ്ചലമാകും. ലോകത്തെ ഏറ്റവും വലിയ പണിമുടക്കായി ഇത് മാറുമെന്നും അദ്ദേഹം പറഞ്ഞു.