കോട്ടയം: നഗരമധ്യത്തിലെ വീട്ടില്‍ വില്‍പനക്കായി സൂക്ഷിച്ചിരുന്ന രണ്ടുകിലോ കഞ്ചാവുമായി ഒഡിഷ സ്വദേശി പൊലിസ് പിടിയിലായി. ഒഡിഷ പുരി ദുര്‍ഗാപൂര്‍ ദാക്കിന്‍ രാധാസ് സ്വദേശിയും കോട്ടയം ബേക്കര്‍ ജങ്ഷനില്‍ വ്യാപാരസ്ഥാപനത്തിലെ ജീവനക്കാരനുമായ സത്യനാരായണ്‍ ജന (28) യെയാണ് വെസ്റ്റ് സി.ഐ നിര്‍മല്‍ ബോസ് അറസ്റ്റ് ചെയ്തത്.
ചന്തക്കുള്ളില്‍ ഉണക്കമീന്‍ മാര്‍ക്കറ്റിന് സമീപം ഇയാള്‍ താമസിച്ചു വരികയായിരുന്ന തടത്തിപ്പറമ്പ് ഭാഗത്തെ വാടക വീടിന്റെ അടുക്കള ഭാഗത്ത് എണ്ണപ്പാട്ടയ്ക്കിടയില്‍ ബാഗിനുള്ളില്‍ സൂക്ഷിച്ച നിലയിലായിരുന്നു കഞ്ചാവ്. ഇവിടെ ഒഡിഷ സ്വദേശി കഞ്ചാവ് വില്‍ക്കുന്നതായി രഹസ്യവിവരം ലഭിച്ചതിന്റെ അടിസ്ഥാനത്തില്‍ വെസ്റ്റ് എസ്.ഐ എം.ജെ അരുണ്‍, ഈസ്റ്റ് എസ്.ഐ ടി.എസ് റെനീഷ് എന്നിവര്‍ നടത്തിയ പരിശോധനയിലാണ് കഞ്ചാവ് കണ്ടെത്തിയത്. കഴിഞ്ഞ ദിവസം ഒഡിഷയില്‍നിന്നും എത്തിയ സത്യനാരായണയുടെ ഭാര്യയുടെ സഹോദരന്‍ ഇവിടെ അഞ്ചുകിലോ കഞ്ചാവ് എത്തിച്ചിരുന്നതായി പൊലിസ് പറഞ്ഞു.