റിയാദ്: വാഹനം തടഞ്ഞു നിര്‍ത്തി ഇന്ത്യക്കാരുടെ പക്കലുണ്ടായിരുന്ന നാലര ലക്ഷം റിയാല്‍ കവര്‍ന്ന സംഭവത്തില്‍  രണ്ടു സഊദി യുവാക്കളെ  പൊലിസ് അറസ്റ്റു ചെയ്തു. വ്യാഴ്‌ഴ്ചയായിരുന്നു സംഭവം. സുരക്ഷാ വകുപ്പുകളെന്ന വ്യാജേനയാണ് വാഹനം തടഞ്ഞു നിര്‍ത്തിയത്. പിന്നീട് തോക്കു ചൂണ്ടി ഭീഷണിപ്പെടുത്തി പണം കവരുകയായിരുന്നു.

അറസ്റ്റിലായ സഊദി  യുവാക്കള്‍ കുറ്റം സമ്മതിച്ചതായാണ് വിവരം. പ്രതികളില്‍ ഒരാളുടെ താമസസ്ഥലത്ത് നടത്തിയ തിരച്ചിലില്‍ റൈഫിളും 57 വെടിയുണ്ടകളും 75,000 സഊദി റിയാല്‍, 16,000 യു.എ.ഇ ദിര്‍ഹം, 1,600 അമേരിക്കന്‍ ഡോളര്‍  സുരക്ഷാ ഭടന്മാരുടെ രണ്ടു യൂനിഫോമുകള്‍ എന്നിവയും കണ്ടെത്തി.  പ്രതികളെ ഇന്ത്യക്കാരന്‍ തിരിച്ചറിഞ്ഞതായി റിയാദ് പൊലിസ് വക്താവ് കേണല്‍ ഫവാസ് അല്‍മൈമാന്‍ അറിയിച്ചു.

അക്രമി സംഘത്തെ ചെറുക്കാന്‍ ശ്രമിക്കുന്നതിനിടെ വെടിയേറ്റ ഇന്ത്യക്കാരന്‍  കിംഗ് സഊദ് മെഡിക്കല്‍ സിറ്റിയില്‍ ചികിത്സയിലാണ്.