ന്യൂഡൽഹി: ശാരീരികമായി ഭിന്നശേഷിയുണ്ടെന്ന കാരണത്താൽ മെഡിക്കൽ വിഭ്യാഭ്യാസം നേടുന്നതിൽ വിലക്കാനാവില്ലെന്ന് സുപ്രിംകോടതി. 40-45 ശതമാനം സംസാര, ഭാഷാ വൈകല്യമുള്ള മഹാരാഷ്ട്രയിൽനിന്നുള്ള മിടുക്കനായ വിദ്യാർഥിക്ക് എം.ബി.ബി.എസ് കോഴ്സ് പഠിക്കാൻ അനുമതി നൽകിയാണ് ബി.ആർ ഗവായ്, അരവിന്ദ് കുമാർ, കെ.വി വിശ്വനാഥൻ എന്നിവരടങ്ങിയ ബെഞ്ച് സുപ്രധാനമായ ഈ വിധി പുറപ്പെടുവിച്ചത്. 

ഭിന്നശേഷിക്കാരായ നിരവധി പേർ വിവിധ മേഖലകളിൽ ഉയരങ്ങളിലെത്തിയത് സുപ്രിംകോടതി ചൂണ്ടിക്കാട്ടി. പ്രതികൂല സാഹചര്യം മറികടന്ന് ഭിന്നശേഷിക്കാരായ രാജ്യത്തിന്റെ പുത്രൻമാരും പുത്രിമാരും ഉയരങ്ങൾ കീഴടക്കിയിട്ടുണ്ട്. പ്രശസ്ത ഭരതനാട്യം നർത്തകി സുധാ ചന്ദ്രൻ, എവറസ്റ്റ് കീഴടക്കിയ അരുണിമ സിൻഹ, പ്രമുഖ കായികതാരം എച്ച്. ബോണിഫസ് പ്രഭു, വ്യവസായി ശ്രീകാന്ത് ബൊല്ല, 'ഇൻഫിനിറ്റ് എബിലിറ്റി' സ്ഥാപകൻ ഡോ. സതേന്ദ്ര സിങ് തുടങ്ങിയവരെല്ലാം ഇത്തരത്തിൽ പ്രതികൂലസാഹചര്യത്തോട് പടവെട്ടി ഉയരങ്ങളിലെത്തിയവരാണ്. ലോകത്തുതന്നെ ഇത്തരക്കാർ നിരവധി പേരുണ്ട്. ഹോമർ, ബീഥോവൻ, ലോഡ് ബൈറോൺ, മിൽട്ടൺ, മൊസാർട്ട് തുടങ്ങിയവരും ഭിന്നശേഷിക്കാരായിരുന്നു.

അവരുടെ കഴിവുകൾ പ്രദർശിപ്പിക്കാൻ അനുവദിച്ചില്ലായിരുന്നെങ്കിൽ ലോകം വളരെ ദരിദ്രമായിപ്പോകുമായിരുന്നു. വിദ്യാർഥിയുടെ വൈകല്യം കോഴ്സിന് തടസമാകുമോ ഇല്ലയോ എന്ന് ഡിസെബിലിറ്റി അസസ്മെന്റ് ബോർഡ് പരിശോധിക്കണം. തടസമാകുമെന്നാണ് കണ്ടെത്തുന്നതെങ്കിൽ അതിന്റെ കാരണവും വ്യക്തമാക്കിയിരിക്കണം.

വൈകല്യം കോഴ്സിനെ ബാധിക്കില്ലെന്ന് കണ്ടെത്തിയാൽ വിദ്യാർഥി കോഴ്സ് ചെയ്യാൻ യോഗ്യനായിരിക്കുമെന്നും ബെഞ്ച് വിധിച്ചു. ഒംകാർ രാമചന്ദ്രഗോണ്ട് എന്ന വിദ്യാർഥിയാണ് ഹരജിക്കാരൻ. നീറ്റ് പരീക്ഷയിൽ യോഗ്യത നേടിയെങ്കിലും 44 ശതമാനം സംസാര, ഭാഷാ വൈകല്യമുണ്ടെന്ന് കണ്ടെത്തിയതിനാൽ പ്രവേശനം ലഭിക്കാതെ വരികയായിരുന്നു.