തിരുവനന്തപുരം: വിവിധ മേഖലകളിലെ ജനസേവന പ്രവര്‍ത്തനങ്ങളിലൂടെ കേരളത്തിന്റെ ഹൃദയത്തിലാണ് നാഷനല്‍ സര്‍വിസ് സ്‌കീമിന്റെ സ്ഥാനമെന്ന് മുഖ്യമന്ത്രി പിണറായി വിജയന്‍. നാഷനല്‍ സര്‍വിസ് സ്‌കീമിന്റെ സംസ്ഥാന വാര്‍ഷിക സംഗമവും അവാര്‍ഡ് വിതരണവും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. യുവജനങ്ങളില്‍ നിസ്വാര്‍ഥ ഇടപെടലും സേവനമനോഭാവവും വളര്‍ത്തുന്നതില്‍ ശ്ലാഘനീയമായ പ്രവര്‍ത്തനങ്ങളാണ് എന്‍.എസ്.എസ് നടത്തുന്നത്. മനസ് നന്നാകട്ടെ എന്ന എന്‍.എസ്.എസിന്റെ ഗാനം തന്നെ ഏറ്റവും പ്രസക്തമായ കാലഘട്ടമാണിത്.
മനസ് നന്നായാല്‍ ജീവിത വീക്ഷണത്തെ തന്നെ സ്വാധീനിക്കുകയും സമൂഹത്തിന് ഉപകാരപ്പെടുന്ന രീതിയില്‍ ജീവിതം നയിക്കാനാവുകയും ചെയ്യും. സ്‌കൂള്‍, കോളജ്, പ്രൊഫഷനല്‍ വിദ്യാഭ്യാസ മേഖലയില്‍ വ്യാപിച്ചുകിടക്കുന്ന എന്‍.എസ്.എസ് നേതൃപരിശീലനം, ജലസംരക്ഷണം, ഇന്റഗ്രേറ്റഡ് ഫാമിങ്, ഹരിത പെരുമാറ്റച്ചട്ടം തുടങ്ങിയ മേഖലകളില്‍ മികച്ച രീതിയിലാണ് പ്രവര്‍ത്തിക്കുന്നത്. ഐക്യവും അച്ചടക്കവും സേവനസന്നദ്ധതയും കൈമുതലാക്കി മറ്റുള്ളവര്‍ക്ക് ഉപകരിക്കുന്ന ജീവിതമാക്കി മാറ്റിയെടുക്കാനാണ് എന്‍.എസ്.എസ് ഇടപെടലുകളിലൂടെ സാധിക്കുന്നത്. യുവജനങ്ങള്‍ക്ക് പ്രചോദനമാകാനും ഈ പ്രവൃത്തികള്‍ വഴിവയ്ക്കുന്നു. വിദ്യാഭ്യാസത്തിന്റെ പരമപ്രധാനമായ ലക്ഷ്യം ഇതാണെന്നും മുഖ്യമന്ത്രി കൂട്ടിച്ചേര്‍ത്തു.
ഒ. രാജഗോപാല്‍ എം.എല്‍.എ മുഖ്യപ്രഭാഷണം നടത്തി. സാങ്കേതിക വിദ്യാഭ്യാസ ഡയരക്ടര്‍ ഡോ. കെ.പി ഇന്ദിരാദേവി, സാങ്കേതിക വിദ്യാഭ്യാസ സീനിയര്‍ ജോയിന്റ് ഡയരക്ടര്‍ ഡോ. സിസാ തോമസ്, എന്‍.എസ്.എസ് റീജ്യനല്‍ ഡയരക്ടര്‍ ജി.പി സജിത്ബാബു സംബന്ധിച്ചു.