വിതുര: പൊന്മുടിയിലെത്തി മടങ്ങിയ വിനോദസഞ്ചാരികള്‍ സഞ്ചരിച്ചിരുന്ന ടെമ്പോ ട്രാവലര്‍ കൊക്കയിലേക്ക് മറിഞ്ഞ് 20 പേര്‍ക്ക് പരുക്ക്. ഗുരുതര പരുക്കേറ്റ മൂന്നു പേരെ തിരുവനന്തപുരം മെഡിക്കല്‍ കോളജ് ആശുപത്രിയിലും മറ്റുള്ളവരെ വിതുര താലൂക്ക് ആശുപത്രിയിലും പ്രവേശിപ്പിച്ചു.
മര്യാപുരം സ്വദേശികളായ ജയകുമാരി, ലീല,സരോജിനി എന്നിവരെയാണ് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. മര്യാപുരം കോടങ്കര സ്വദേശികളായ ലളിത, (50), ധനീഷ് (12), നന്ദിത(24), ബൈജു (32), അക്ഷയ് (രണ്ടര), സിനി (38), വീന (16),ഗാഥ (21), അനുശ്രീ (20), അനന്യ(6), അശ്വനി (19), ഷീജ (37), ജയകുമാരി (47), ബില്‍സി (11), ജിജിമോള്‍ (21), സരോജിനി (61), അന്‍സി (11), ഗോപി (50), ലീല (42), അലീന (12) എന്നിവര്‍ക്കാണ് പരുക്കേറ്റത്. ഇന്നലെ പകല്‍ 11ന് പൊന്മുടി നാലാം ഹെയര്‍പിന്‍ വളവിലാണ് അപകടം. നിയന്ത്രണം വിട്ട് കൊക്കയിലേക്ക് മറിഞ്ഞ് മരത്തിലിടിച്ചാണ് വാഹനം നിന്നത്. 23 അംഗ സംഘമാണ് കുട്ടികളോടൊപ്പം പൊന്മുടിയിലെത്തിയത്. സ്‌കൂള്‍ അവധിദിനത്തില്‍ എല്ലാ വര്‍ഷവും ഇവര്‍ പൊന്മുടിയിലേക്ക് യാത്രവരാറുണ്ട്.