കരുനാഗപ്പള്ളി: ദീര്‍ഘകാലമായി കോണ്‍ഗ്രസ് ഭരിക്കുന്ന കുലശേഖരപുരം 995-ാം നമ്പര്‍ സര്‍വ്വിസ് സഹകരണ ബാങ്ക് തെരഞ്ഞെടുപ്പില്‍ കോണ്‍ഗ്രസ് പ്രവര്‍ത്തകര്‍ ചേരിതിരിഞ്ഞ് മത്സരരംഗത്തേക്ക്. സംഘടനാവിരുദ്ധ പ്രവര്‍ത്തനം നടത്തിയതിന്റെ പേരില്‍ രണ്ട് പഞ്ചായത്ത് മെമ്പര്‍മാര്‍ ഉള്‍പ്പെടെ മൂന്നുപേരെ പാര്‍ട്ടിയുടെ പ്രാഥമിക അംഗത്വം ഉള്‍പ്പെടെയുള്ള എല്ലാ സ്ഥാനങ്ങളില്‍ നിന്നും ഡി.സി.സി പ്രസിഡന്റ് ബിന്ദുകൃഷ്ണ പുറത്താക്കി. ദീര്‍ഘകാലമായി അധികാരത്തില്‍ തുടര്‍ന്നുവരുന്നവരെ ബാങ്കുകളുടെ ഭരണസമിതിയില്‍ നിന്നും മാറ്റി പുതുമുഖങ്ങള്‍ക്ക് അവസരം നല്‍കണമെന്ന് കെ.പി.സി.സി നിര്‍ദ്ദേശമുണ്ട്. നിലവിലെ ഭരണസമിതി അംഗങ്ങള്‍ ബാങ്കിടപാടില്‍ കൃത്രിമം കാട്ടിയെന്ന പരാതിയെതുടര്‍ന്ന് വിജിലന്‍സ് അന്വേഷണം നേരിടുകയാണ്. വിജിലന്‍സ് കോടതിയുടെ വിധി ഭരണസമിതി അംഗങ്ങള്‍ക്കെതിരായി വന്നാല്‍ ഇവര്‍ അയോഗ്യരാകുകയും ബാങ്ക് അഡ്മിനിസ്‌ട്രേറ്റര്‍ ഭരണത്തിലാകുന്ന സാഹചര്യവും ഉണ്ടാകും. ഇത് ഒഴിവാക്കുന്നതിന് നിലവിലുള്ള മുഴുവന്‍ ഭരണസമിതി അംഗങ്ങളേയും മാറ്റി പുതിയ പാനല്‍ അവതരിപ്പിക്കുവാനായിരുന്നു പാര്‍ട്ടി തീരുമാനിച്ചത്. എന്നാല്‍ തീരുമാനം അംഗീകരിക്കാതെ ബാങ്കിന്റെ മുന്‍ പ്രസിഡന്റുമാരായിരുന്ന രേണുജി, മുഹമ്മദ് മുസ്തഫ,ശിവാനന്ദന്‍ എന്നിവരുടെ നേതൃത്വത്തില്‍ റിബല്‍ പാനല്‍ അവതരിപ്പിച്ച് നോമിനേഷന്‍ നല്‍കി. തുടര്‍ന്ന് ജില്ലാ, സംസ്ഥാന നേതാക്കള്‍ ഇടപെട്ടിട്ടും ഇവര്‍ നോമിനേഷന്‍ പിന്‍വലിക്കാന്‍ തയ്യാറായില്ല. വിഭാഗീയ പ്രവര്‍ത്തനങ്ങള്‍ക്ക് നേതൃത്വം കൊടുത്ത ബ്ലോക്ക് കോണ്‍ഗ്രസ് കമ്മിറ്റിയുടെ വൈസ് പ്രസിഡന്റ് വി.പി.എസ് മേനോന്‍, പഞ്ചായത്ത് അംഗങ്ങളായ അലാവുദ്ദീന്‍, ശിവാനന്ദന്‍ എന്നിവരെ ജില്ലാ പ്രസിഡന്റ് പുറത്താക്കുകയായിരുന്നു.കോണ്‍ഗ്രസ്സിന്റെ ഔദ്യോഗിക പാനല്‍ പ്രഖ്യാപന കണ്‍വന്‍ഷന്‍ യു.ഡി.എഫ് ചെയര്‍മാന്‍ കെ.സി രാജന്‍ ഉദ്ഘാടനം ചെയ്തു. എം.ഇബ്രാഹിംകുട്ടി അധ്യക്ഷനായി. സി.ആര്‍ മഹേഷ്, കെ.രാജശേഖരന്‍, കെ.ജി രവി, നീലികുളം സദാനന്ദന്‍, മുനമ്പത്ത് വഹാബ്, എച്ച്. സലീം, കെ.എസ് പുരം സുധീര്‍, കെ.കെ സുനില്‍കുമാര്‍, കെ.എം നൗഷാദ്, അശോകന്‍കുറുങ്ങപ്പള്ളി തുടങ്ങിയവര്‍ സംസാരിച്ചു.