തിരുവനന്തപുരം: യൂനിവേഴ്‌സിറ്റി കോളജ് അതിക്രമവുമായി ബന്ധപ്പെട്ട് പൊലിസ് കോണ്‍സ്റ്റബിള്‍ പി.എസ്.സി പട്ടികയിലെ രണ്ടാം റാങ്കുകാരനും പ്രതി.

അക്രമിസംഘത്തിലുണ്ടായിരുന്ന പ്രണവ് ആണ് പൊലിസ് പട്ടികയിലെ രണ്ടാം റാങ്കുകാരന്‍. കത്തിക്കുത്ത് കേസിലെ 17-ാം പ്രതിയാണ് പ്രണവ്. ഇതേ കേസില്‍ ഉള്‍പ്പെട്ട ശിവരഞ്ജിത്ത് റാങ്ക് പട്ടികയില്‍ ഒന്നാമതും നസീം 28-ാമതുമാണ്. കാസര്‍കോട് സിവില്‍ പൊലിസ് ഓഫിസര്‍ റാങ്ക് പട്ടികയിലാണ് ശിവരഞ്ജിത്ത്, പ്രണവ്, നസീം എന്നിവര്‍ ഉള്‍പ്പെട്ടിട്ടുള്ളത്.

കേസില്‍ പ്രതിയാക്കപ്പെട്ടതോടെ പ്രണവ് ഉള്‍പ്പടെ എട്ടുപേരെക്കൂടി കോളജ് അധികൃതര്‍ അനിശ്ചിതകാലത്തേക്ക് സസ്‌പെന്‍ഡ് ചെയ്തു. കന്റോണ്‍മെന്റ് പൊലിസ് കോളജ് അധികൃതര്‍ക്ക് നല്‍കിയ റിപ്പോര്‍ട്ടിന് പിന്നാലെയാണ് നടപടിയുണ്ടായത്. ഇനിയൊരു അറിയിപ്പ് ഉണ്ടാകുന്നതുവരെ എട്ടുപേരും കാംപസിനുള്ളില്‍ പ്രവേശിക്കരുതെന്നും സസ്‌പെന്‍ഷന്‍ ഉത്തരവില്‍ പറയുന്നു.

കേസില്‍ പ്രതിചേര്‍ക്കപ്പെട്ടതോടെ പ്രണവിനായി പൊലിസ് അന്വേഷണം ഊര്‍ജിതമാക്കിയിട്ടുണ്ട്. ഇയാള്‍ ഒളിവിലാണെന്നാണ് പൊലിസ് വിശദീകരണം. ശിവരഞ്ജിത്തിന്റെ വീട്ടില്‍നിന്ന് സര്‍വകലാശാല ഉത്തരക്കടലാസ് കണ്ടെത്തിയ സംഭവത്തിലും പൊലിസ് പ്രണവിനെ അന്വേഷിക്കുന്നുണ്ട്. പിടിച്ചെടുത്ത ഉത്തരക്കടലാസുകളിലൊന്ന് പ്രണവിന്റേതാണെന്ന് കണ്ടെത്തിയിരുന്നു.