ആലപ്പുഴ: ശശി തരൂര്‍ പറയുന്നതു പോലെ കോണ്‍ഗ്രസ് നാഥനില്ലാകളരിയൊന്നുമല്ലെന്ന് പ്രതിപക്ഷ നേതാവ് രമേശ് ചെന്നിത്തല. കോണ്‍ഗ്രസ് അധ്യക്ഷനെ ഈ ആഴ്ച തന്നെ തിരഞ്ഞെടുക്കുമെന്നാണു പ്രതീക്ഷയെന്നും അധ്യക്ഷനെ ഉടന്‍ തിരഞ്ഞെടുക്കണമെന്നത് എല്ലാവരുടെയും ആഗ്രഹമാണെന്നും ചെന്നിത്തല ആലപ്പുഴയില്‍ പറഞ്ഞു.

നേരത്തെ കോണ്‍ഗ്രസ് അധ്യക്ഷന് സ്ഥാനത്ത് ആള്‍ വരാത്തതില്‍ അസംതൃപ്തി പ്രകടമാക്കി ശശി തരൂര്‍ രെഗത്തെത്തിയിരുന്നു. കോണ്‍ഗ്രസ് നാഥനില്ലാക്കളരിയായെന്നും ഉത്തരവാദിത്തമില്ലാത്ത പാര്‍ട്ടിയാവരുത് കോണ്‍ഗ്രസ്സെന്നുമായിരുന്നു അദ്ദേഹം അഭിപ്രായപ്പെട്ടത്. ജനങ്ങള്‍ കോണ്‍ഗ്രസിനെ ഉറ്റുനോക്കുന്നു എന്ന് നേതൃത്വം മനസ്സിലാക്കണം. കര്‍ണാടകത്തിലും ഗോവയിലും തിരിച്ചടിയുണ്ടായത് നാഥനില്ലാത്തതിനാലാണ്. പാര്‍ട്ടിയുടെ ഇപ്പോഴത്തെ അവസ്ഥയില്‍ ദുഖമുണ്ട്. ഇതുകണ്ടുനില്‍ക്കാന്‍ കഴിയുന്നില്ല.

നോമിനേറ്റ് ചെയ്തുവരുന്ന പ്രസിഡന്റ് ഇനി വേണ്ട. സംഘടനാ തെരഞ്ഞെടുപ്പിലൂടെയാണ് അധ്യക്ഷന്‍ വരേണ്ടത്. അധ്യക്ഷനായി പാര്‍ട്ടി ജനങ്ങളെ സമീപിക്കട്ടെ. ജനങ്ങള്‍ക്ക് വിശ്വാസമുള്ളയാളാണ് അധ്യക്ഷനാവേണ്ടത്. സംഘടനയെ യുവതലമുറയില്‍പ്പെട്ട ആള്‍ നയിക്കാന്‍ സമയമായെന്ന് അഭിപ്രായപ്പെട്ട തരൂര്‍, അതേസമയം ഈ പദവിയിലേക്ക് പ്രിയങ്കാ ഗാന്ധി യോഗ്യയാണ്-ശശി തരൂര്‍ പറഞ്ഞു.