ചേവായൂര്‍: നീണ്ട കാത്തിരിപ്പിന് ശേഷം മൂഴിക്കല്‍ വിരുപ്പില്‍ ജനപ്രിയ അങ്കണവാടിക്ക് വൈദ്യുതി ലഭിച്ചു. അധികൃതരുടെ അനാസ്ഥമൂലം ബില്‍ഡിങ് പണി പൂര്‍ത്തിയായി മൂന്ന് വര്‍ഷത്തിന് ശേഷവും വൈദ്യുതി ലഭിക്കാത്തത് സുപ്രഭാതം റിപ്പോര്‍ട്ട് ചെയ്തിരുന്നു.
വാര്‍ത്ത വന്നതിന് തൊട്ടടുത്ത ദിവസം തന്നെ കെട്ടിടത്തിന് വൈദ്യുതി കണക്ഷന്‍ നല്‍കുകയായിരുന്നു. 2015ല്‍ കെട്ടിടത്തിന്റെ പ്രവൃത്തി കഴിഞ്ഞപ്പോള്‍ തന്നെ വയറിങ് പൂര്‍ത്തീകരിക്കുകയും വൈദ്യുതിക്കായി പിരിവെടുത്ത് കമ്മിറ്റിക്ക് രൂപം നല്‍കുകയും ചെയ്തിരുന്നു. എന്നാല്‍ മൂന്ന് വര്‍ഷത്തോളം വെദ്യുതി ലഭിക്കാത്തതിനാല്‍ കുട്ടികള്‍ ഉച്ചച്ചൂട് സഹിക്കാനാവാതെ ദുരിതമനുഭവിക്കുകയായിരുന്നു.
പണം അടച്ചാല്‍ വൈദ്യുതി കണക്ഷന്‍ നല്‍കുന്നതിന് തടസ്സമില്ലെന്ന് കെ.എസ്.ഇ.ബി അറിയിച്ചിരുന്നു. ഇതോടെ സംഭവത്തില്‍ കമ്മിറ്റി ഭാരവാഹികള്‍ക്കെതിരേ രക്ഷിതാക്കളുടെ പ്രതിഷേധമുയര്‍ന്നു. കോര്‍പറേഷന്‍ 16ാം വാര്‍ഡില്‍ പ്രവര്‍ത്തിക്കുന്ന അങ്കണവാടിയില്‍ കുടിവെള്ള സംവിധാനവും ഒരുക്കിയിട്ടില്ല. തൊട്ടടുത്ത വീട്ടില്‍ നിന്നാണ് ഇപ്പോള്‍ കുട്ടികള്‍ക്ക് കുടിവെള്ളമെത്തിക്കുന്നത്. മൂന്ന് വര്‍ഷത്തിന് ശേഷം അങ്കണവാടിക്ക് വൈദ്യുതി ലഭിച്ചതിന്റെ സന്തോഷത്തിലാണ് രക്ഷിതാക്കള്‍.