കാസര്‍കോട്: എസ്.എസ്.എയുടെയും പൊതുവിദ്യാഭ്യാസ വകുപ്പിന്റെയും സംയുക്താഭിമുഖ്യത്തില്‍ സംഘടിപ്പിക്കുന്ന ഈ വര്‍ഷത്തെ ജില്ലാ സ്‌കൂള്‍ പ്രവേശനോത്സവം ജില്ലയില്‍ തന്നെ ഉയര്‍ന്ന സ്‌കൂള്‍ പ്രവേശനം സാധ്യമാക്കിയ ജി.ജെ.ബി.എസ് പേരോലില്‍ നടത്തും. നാളെ രാവിലെ 9.30നു വാദ്യഘോഷങ്ങളുടെ അകമ്പടിയുള്ള ഘോഷയാത്രയോടെയാണു പ്രവേശനോത്സവം ആരംഭിക്കുക. പി. കരുണാകരന്‍ എം.പി പ്രവേശനോത്സവം ഉദ്ഘാടനം ചെയ്യും. പി.ബി അബ്ദുല്‍ റസാഖ് എം.എല്‍.എ അധ്യക്ഷനാകും. എന്‍.എ നെല്ലിക്കുന്ന് എം.എല്‍.എ മുഖ്യാതിഥി ആയിരിക്കും. ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ പഠനോപകരണങ്ങള്‍ വിതരണം ചെയ്യും. കലക്ടര്‍ കെ. ജീവന്‍ബാബു വൃക്ഷത്തൈ വിതരണം ചെയ്യും. മഞ്ചേശ്വരം ബ്ലോക്ക് പഞ്ചായത്ത് പ്രസിഡന്റ് മുഹമ്മദ്കുഞ്ഞി ചായിന്റടി യൂനിഫോമും കുമ്പള ഗ്രാമപഞ്ചായത്ത് പ്രസിഡന്റ് പുണ്ഡരീകാക്ഷ ഭക്ഷണ പാത്രവും ഡി.ഐ.ഇ.ടി പ്രിന്‍സിപ്പാള്‍ ഡോ.പി.വി കൃഷ്ണകുമാര്‍ പാഠപുസ്തകങ്ങളും വിതരണം ചെയ്യും.