ന്യൂഡല്‍ഹി: ഇന്ത്യന്‍ അമ്പയര്‍ എസ്. രവിയെ ഐ.സി.സിയുടെ എലൈറ്റ് പാനലില്‍നിന്ന് പുറത്താക്കി. കഴിഞ്ഞദിവസം നടന്ന വാര്‍ഷിക റിവ്യൂവിന് ശേഷമാണ് രവിക്ക് എലൈറ്റ് പദവി നഷ്ടമായത്. രവിക്ക് പുറമേ ഇംഗ്ലണ്ട് അമ്പയറായ ഇയാന്‍ ഗുഡിനെയും പുറത്താക്കിയിട്ടുണ്ട്.
ഇരുവര്‍ക്കും പകരമായി ഇംഗ്ലണ്ടിന്റെ മൈക്കല്‍ ഗഫ്, വെസ്റ്റിന്‍ഡീസിന്റെ ജോയല്‍ വില്‍സണ്‍ എന്നിവരാണ് ലിസ്റ്റില്‍ ഇടം പിടിച്ചത്. അതേസമയം ലോകകപ്പോടെ വിരമിച്ചതിനാലാണ് ഇയാന്‍ ഗുഡിനെ എലൈറ്റ് പാനലില്‍നിന്ന് നീക്കിയതെങ്കില്‍ കഴിഞ്ഞ കുറച്ച് നാളുകളായി അമ്പയറിങില്‍ വരുത്തുന്ന പിഴവുകളാണ് രവിക്ക് തിരിച്ചടിയായത്. ഇതോടെ ഐ.സി.സി അമ്പയര്‍മാരുടെ എലൈറ്റ് പാനലില്‍ ഇന്ത്യന്‍ പ്രാതിനിധ്യം ഇല്ലാതായി. നിലവില്‍ അലീം ദര്‍, കുമാര്‍ ധര്‍മസേന, മറൈസ് എറാസ്മസ്, ക്രിസ് ഗഫനി, റിച്ചാര്‍ഡ് ഇല്ലിങ് വര്‍ത്ത്, റിച്ചാര്‍ഡ് കെറ്റില്‍ബോറോ, നിഗല്‍ ലോങ്, ബ്രൂക്‌സ് ഓക്‌സന്‍ഫോഡ്, പോള്‍ റീഫല്‍, റോഡ് ടക്കര്‍ എന്നിവരാണ് പാനലില്‍ ഉള്ളത്.
അതേസമയം ഐ.സി.സി മാച്ച് റഫറിമാരുടെ എലൈറ്റ് പാനലില്‍ മാറ്റമില്ല. മുന്‍ ഇന്ത്യന്‍ താരം ജവഗല്‍ ശ്രീനാഥ് ഉള്‍പ്പെടെ നേരത്തെയുണ്ടായിരുന്ന ഏഴ് മാച്ച് റഫറിമാര്‍ തന്നെ മാച്ച് റഫറിമാരുടെ എലൈറ്റ് പാനലില്‍ തുടരും.
ജവഗല്‍ ശ്രീനാഥിന് പുറമേ, ഡേവിഡ് ബൂണ്‍, ക്രിസ് ബ്രോഡ്, ജെഫ് ക്രോ, രഞ്ജന്‍ മദുഗുലെ, ആന്‍ഡി പൈക്രോഫ്റ്റ്, റിച്ചി റിച്ചാര്‍ഡ്‌സണ്‍ എന്നിവരാണ് ഉള്‍പ്പെട്ടത്.