പുതുശേരി: ഐ.ഐ.ടിയിലെ രണ്ടാം ബാച്ചിലേക്കു പ്രവേശനം നേടിയ മലയാളികള്‍ ആണ്‍കുട്ടികള്‍ മാത്രം. ആദ്യബാച്ചിലും പെണ്‍കുട്ടികളുണ്ടായിരുന്നില്ല. രണ്ടാം ബാച്ചില്‍ എ.എസ് അഖിലേഷ്, സഞ്ജയ് പ്രദീപ്, വി ബാലു, വി നവീന്‍, ആര്‍ റോഷിന്‍, ജിതില്‍ ലാല്‍ പ്രദീപ്, ടി.വി വിവേക്, വിസ്മയ് രാജ്, മെല്‍വിന്‍ എം സണ്ണി, അര്‍ജുന്‍ ദേവ്, പാട്രിക് ജോര്‍ജ് എന്നിവരാണ് ഐ.ഐ.ടിയിലെ മലയാളിപ്പട.
തിരുവനന്തപുരം, പത്തനംതിട്ട, എറണാകുളം, കോഴിക്കോട്, കണ്ണൂര്‍ ജില്ലകളില്‍ നിന്നുള്ളവരാണ് ഇവര്‍. ഏറ്റവും കൂടുതല്‍ വിദ്യാര്‍ഥികള്‍ എത്തിയിരിക്കുന്നത് തെലങ്കാന, രാജസ്ഥാന്‍ സംസ്ഥാനങ്ങളില്‍ നിന്നാണ്. ആന്ധ്രാ പ്രദേശില്‍നിന്നുള്ള 15 പേരെക്കൂടി ചേര്‍ത്താല്‍ 32 വിദ്യാര്‍ഥികള്‍ തെലുങ്കു ദേശത്തുനിന്ന് എത്തിയിട്ടുണ്ട്. 16 ഉത്തരേന്ത്യന്‍ സംസ്ഥാനങ്ങളില്‍ നിന്നായി 67 വിദ്യാര്‍ഥികളാണു പ്രവേശനം നേടിയിരിക്കുന്നത്.
മെക്കാനിക്കല്‍, സിവില്‍, കംപ്യൂട്ടര്‍, ഇലക്ട്രിക്കല്‍ എന്നിങ്ങനെ നാല് വിഭാഗങ്ങളാണ് പാലക്കാട് ഐ.ഐ.ടിയിലുള്ളത്. ഓരോ വിഭാഗത്തിനും 30 സീറ്റ് വീതമുള്ള ഐ.ഐ.ടിയില്‍ യഥാക്രമം 29, 25, 30, 27 വിദ്യാര്‍ഥികളാണ് മെക്കാനിക്കല്‍, സിവില്‍, കംപ്യൂട്ടര്‍, ഇലക്ട്രിക്കല്‍ വിഭാഗങ്ങളിലേക്ക് പ്രവേശനം നേടിയിരിക്കുന്നത്.