ചെര്‍ക്കള(കാസര്‍കോട്): സര്‍വമത സാഹോദര്യത്തിനും ജനകീയമായ പുരോഗതിക്കും വേണ്ടി ജീവിതം സമര്‍പ്പിച്ച നേതാവാണ് പാണക്കാട് സയ്യിദ് മുഹമ്മദലി ശിഹാബ് തങ്ങളെന്ന് കാലിക്കറ്റ് സര്‍വകലാശാല മുന്‍ വൈസ് ചാന്‍സിലര്‍ ഡോ.കെ.കെ.എന്‍. കുറുപ്പ് . മുഹമ്മദലി ശിഹാബ് തങ്ങളുടെ പത്താമത് വിയോഗ വാര്‍ഷികത്തില്‍ ചെങ്കളയിലെ ശിഹാബ് തങ്ങള്‍ ഇസ്‌ലാമിക് അക്കാദമി സംഘടിപ്പിച്ച ചരിത്ര സെമിനാറില്‍ സംസാരിക്കുകയായിരുന്നു അദ്ദേഹം.
ശിഹാബ് തങ്ങളുടെ സ്മരണകള്‍ എന്നും നിലനിര്‍ത്താന്‍ സ്ഥാപനം അന്താരാഷ്ട്ര തലത്തിലേക്ക് ഉയര്‍ത്തണമെന്നും ഇതു സമൂഹത്തിന് നല്ലപാഠങ്ങള്‍ പകര്‍ന്നു നല്‍കുമെന്നും അദ്ദേഹം പറഞ്ഞു.
മത സാഹോദര്യത്തിന്റെയും മാനവ ഐക്യത്തിന്റെയും നല്ല പാഠങ്ങള്‍ സമൂഹത്തിനു മുന്നില്‍ സ്വന്തം ജീവിതത്തിലൂടെ പകര്‍ന്നു നല്‍കിയ മുഹമ്മദലി ശിഹാബ് തങ്ങള്‍ രാജ്യത്തെ അത്ഭുത വ്യക്തിത്വങ്ങളില്‍ ഒരാളായിരുന്നു. തങ്ങളുടെ ഓര്‍മകള്‍ എന്നും സ്മരിക്കപ്പെടണമെന്നും ഡോ.കെ.കെ.എന്‍. കുറുപ്പ് പറഞ്ഞു.
ചടങ്ങ് പ്രൊഫ. കെ.ആലിക്കുട്ടി മുസ്‌ലിയാര്‍ ഉദ്ഘാടനം ചെയ്തു. ചെങ്കളം അബ്ദുല്ല ഫൈസി അധ്യക്ഷനായി. സിദ്ധീഖ് നദ്‌വി ചേരൂര്‍, പ്രൊഫ. ഇ. ഇസ്മായില്‍, മോയിന്‍ ഹുദവി മലയമ്മ,എന്‍.എ.നെല്ലിക്കുന്ന് എം.എല്‍.എ തുടങ്ങിയവര്‍ സംസാരിച്ചു.