കോവളം: വെങ്ങാനൂര്‍ നീലകേശി ക്ഷേത്രത്തിനു സമീപത്തെ പരമേശ്വരന്‍ നായര്‍ റോഡില്‍ ലോഡുമായി എത്തിയ മിനി ലോറി നിയന്ത്രണം വിട്ട് തോട്ടിലേക്ക് മറിഞ്ഞു. ഡ്രൈവറും ക്ലീനറും അത്ഭുതകരമായി രക്ഷപ്പെട്ടു.
ഇന്നലെ ഉച്ചക്ക് 12 മണിയോട് കൂടിയായിരുന്നു അപകടം. സമീപത്തെ ഒരു വീട്ടിലേക്ക് ചല്ലിയുമായി എത്തിയ മിനി ലോറിയാണ് മറിഞ്ഞത്.
റോഡ് സൈഡില്‍ ബൈക്കുകള്‍ പാര്‍ക്ക് ചെയ്തിരുന്നതിനാല്‍ റോഡ് സൈഡിലെ തോടിന്റെ സംരക്ഷണ ഭിത്തിയിലേക്ക് വാഹനത്തിന്റെ ടയറ് കയറിയതോടെ സംരക്ഷണ ഭിത്തി ഇടിഞ്ഞ് വാഹനം തോട്ടിലേക്ക് മറിയുകയായിരുന്നു. ഈ അടുത്ത് നിര്‍മ്മിച്ച റോഡും തോടിന്റെ സംരക്ഷണ ഭീതിയും ആണ് തകര്‍ന്നത്. മൂന്ന് വൈദ്യുത തൂണുകളും തകര്‍ന്നിട്ടുണ്ട്.
രാത്രിയോടെ ക്രെയിന്‍ ഉപയോഗിച്ചാണ് തോട്ടിലേക്ക് മറിഞ്ഞ മിനി ലോറി പുറത്തെടുത്തത്.