തിരുവനന്തപുരം: മദ്യശാലകള്‍ തുറക്കാന്‍ തദ്ദേശസ്വയംഭരണ സ്ഥാപനങ്ങളുടെ അനുമതി വേണമെന്ന വ്യവസ്ഥ ഒഴിവാക്കിക്കൊണ്ട് ഓര്‍ഡിനന്‍സ് പുറപ്പെടുവിച്ചതില്‍ പ്രതിഷേധവുമായി ക്രൈസ്തവ മതമേലധ്യക്ഷന്‍മാര്‍ ഗവര്‍ണര്‍ പി. സദാശിവത്തെയും മുഖ്യമന്ത്രി പിണറായി വിജയനെയും കണ്ടു.
ഭേദഗതി സംസ്ഥാനത്ത് മദ്യമൊഴുകാന്‍ ഇടയാക്കുമെന്ന് അവര്‍ ഗവര്‍ണറോടും മുഖ്യമന്ത്രിയോടും പറഞ്ഞു.
ലത്തീന്‍ അതിരൂപത ആര്‍ച്ച് ബിഷപ്പ് ഡോ. എം. സൂസെപാക്യത്തിന്റെ നേതൃത്വത്തിലുള്ള സംഘം ഗവര്‍ണറെ സന്ദര്‍ശിച്ച് ഓര്‍ഡിനന്‍സില്‍ ഒപ്പുവയ്ക്കരുതെന്ന് അഭ്യര്‍ഥിച്ചെങ്കിലും അപ്പോഴേക്കും ഒപ്പുവച്ചു കഴിഞ്ഞിരുന്നു. സര്‍ക്കാര്‍ പ്രഖ്യാപിത നയങ്ങളില്‍നിന്ന് പിറകോട്ടു പോകുകയാണെന്ന് അവര്‍ മുഖ്യമന്ത്രിയോടു പറഞ്ഞു.
സുപ്രിം കോടതി പാതയോരങ്ങളിലെ മദ്യവില്‍പ്പന നിരോധിച്ചത് വലിയ ഗുണഫലമുണ്ടാക്കിയിട്ടുണ്ട്. സര്‍ക്കാര്‍ നിലപാട് ആ ഗുണഫലം ഇല്ലാതാക്കുമെന്ന ആശങ്കയുണ്ട്.
ഈ നിലപാടുമായി സര്‍ക്കാര്‍ മുന്നോട്ടുപോയാല്‍ ശക്തമായ സമരപരിപാടികള്‍ നേരിടേണ്ടിവരുമെന്ന് അവര്‍ മുന്നറിയിപ്പു നല്‍കി. എന്നാല്‍, സര്‍ക്കാര്‍ നടപടിയെ മുഖ്യമന്ത്രി ന്യായീകരിച്ചു. മദ്യവുമായി ബന്ധപ്പെട്ട് താഴേത്തട്ടിലുണ്ടാകുന്ന ക്രമക്കേടുകള്‍ ഒഴിവാക്കാനാണ് ഓര്‍ഡിനന്‍സെന്ന് അദ്ദേഹം പറഞ്ഞു.
ബിഷപ്പ് ഡോ. ജോഷ്വ മാര്‍ ഇഗ്നാത്തിയോസ്, കവയിത്രി സുഗതകുമാരി, സ്വാമി ഗുരുരത്‌നം ജ്ഞാനതപസ്വി തുടങ്ങിയവരും സംഘത്തിലുണ്ടായിരുന്നു.
ഓര്‍ഡിനന്‍സ് വഞ്ചനയെന്ന് പിന്നീട് സൂസെപാക്യം മാധ്യമങ്ങളോടു പറഞ്ഞു. ഇതിനെതിരേ ശക്തമായ സമരങ്ങളുമായി മുന്നോട്ടുപോകും. എട്ടിനു പ്രത്യേക നിയമസഭാ സമ്മേളനം ചേരുമ്പോള്‍ സഭയ്ക്കു പുറത്ത് നിരാഹാര സമരം നടത്തും. സര്‍ക്കാര്‍ മദ്യലോബിയുമായി ചേര്‍ന്ന് അവരെ പ്രോത്സാഹിപ്പിക്കുന്ന പ്രതീതിയാണുള്ളതെന്നും അദ്ദേഹം പറഞ്ഞു.
ഇക്കാര്യത്തില്‍ ഗവര്‍ണര്‍ക്കു പരിമിതികളുണ്ടെന്ന് സുഗതകുമാരി പറഞ്ഞു. അതു മനസിലാക്കുന്നു. ഭരണ, പ്രതിപക്ഷ നേതാക്കളെ ഇനിയുംകണ്ട് സര്‍ക്കാര്‍ നടപടിമൂലമുണ്ടാകാനിടയുള്ള പ്രത്യാഘാതങ്ങള്‍ ധരിപ്പിക്കുമെന്നും അവര്‍ പറഞ്ഞു.