പാരീസ്: മുന്‍ ഫ്രഞ്ച് സ്‌ട്രൈക്കര്‍ തിയറി ഹെന്റിയെ ഫ്രഞ്ച് ലീഗ് ക്ലബ് മൊണാക്കോയുടെ മുഖ്യ പരിശീലകനായി നിയമിച്ചു. ക്ലബുമായി മൂന്നു വര്‍ഷത്തെ കരാറിലാണ് അദ്ദേഹം ഒപ്പുവച്ചത്. ഹെന്റിയുടെ ഫുട്‌ബോള്‍ കരിയറിന് തുടക്കമിട്ട ക്ലബ് കൂടിയാണ് മൊണാക്കോ. ഇത്രയും വലിയൊരു അവസരം മൊണാക്കോ തനിക്കു നല്‍കിയതില്‍ നന്ദിയുണ്ടെന്ന് ഹെന്റി പ്രതികരിച്ചു. ഫുട്‌ബോള്‍ കരിയറിനോട് ഗുഡ്‌ബൈ പറഞ്ഞ ശേഷം യൂറോപ്പിലെ മുന്‍നിര ടീമായ ബെല്‍ജിയത്തിന്റെ അസിസ്റ്റന്റ് കോച്ചായി പ്രവര്‍ത്തിച്ചു വരികയായിരുന്നു അദ്ദേഹം. കഴിഞ്ഞ ലോകകപ്പില്‍ മൂന്നാംസ്ഥാനത്ത് ഫിനിഷ് ചെയ്ത ടീമാണ് ബെല്‍ജിയം. ടീമിന്റെ മോശം പ്രകടനത്തെ തുടര്‍ന്നു ഈയാഴ്ച പുറത്താക്കപ്പെട്ട ലിയൊനാര്‍ഡോ ജാര്‍ഡിമിനു പകരക്കാരനായാണ് ഹെന്റിയെ മൊണാക്കോ നിയമിച്ചത്.