അഷ്‌റഫ് പൂച്ചാക്കല്‍

പൂച്ചാക്കല്‍: ധീരജവാന്‍ ജോമോന്‍ ജോര്‍ജിന്റെ ഔദ്യോഗിക സ്മാരകം ഒരുങ്ങുന്നു. ജോമോന്റെ പൂര്‍വ വിദ്യാലയമായ പൂച്ചാക്കല്‍ ശ്രീകണ്‌ഠേശ്വരം എസ്.എന്‍.എച്ച്.എസ് സ്‌കൂളിലാണ് പ്രവൃത്തി അവസാനഘട്ടിതലെത്തിയ സ്മാരകം ഒരുങ്ങുന്നത്. സ്മാരകത്തിന്റെ അനാശ്ചാദനം 21ന് ഔദ്യോഗിക പരിപാടികളോടെ നടക്കും.
പള്ളിപ്പുറം തിരുനല്ലൂര്‍ പൊറ്റേച്ചിറയില്‍ ജോമോന്‍ ജോര്‍ജ് ഇന്തോ-ടിബറ്റന്‍ ബോര്‍ഡര്‍ പൊലിസ് (ഐ.ടി.ബി.പി) അംഗമായിരിക്കെ 2013 ജൂണില്‍ ഉത്തരാഖണ്ഡിലുണ്ടായ പ്രളയ രക്ഷാപ്രവര്‍ത്തനത്തിനിടെ ഹെലികോപ്റ്റര്‍ തകര്‍ന്ന് കൊല്ലപ്പെടുകയായിരുന്നു. ജോമോന്റെ പൂര്‍വ വിദ്യാലയങ്ങളില്‍ ഏതെങ്കിലും ഒന്നില്‍ സ്മാരകം നിര്‍മിക്കാനുള്ള ഐ.ടി.ബി.പി തീരുമാനത്തിന്റെ ഭാഗമായാണ് ശ്രീകണ്‌ഠേശ്വരം എച്ച്.എസ്.എസ് അങ്കണത്തില്‍ സ്മാരകം നിര്‍മിക്കുന്നത്. ഇവിടെ ഹയര്‍സെക്കന്‍ഡറി വിദ്യാര്‍ഥിയായിരുന്നു ജോമോന്‍. ഐ.ടി.ബി.പി ഉദ്യോഗസ്ഥര്‍ തന്നെയാണ് സ്മാരകത്തിന്റെ നിര്‍മാണം നടത്തുന്നത്. ഐ.ടി.ബി.പിയില്‍ ജോലിക്കിടെ മരിച്ച ഉദ്യോഗസ്ഥരുടെ അനുസ്മരണ ദിനമായ 21ന് സ്മാരകത്തിന്റെ അനാശ്ചാദനവും അനുസ്മരണവും നടത്തും
നൂറനാട് നിന്നുള്ള ഐ.ടി.ബി.പി സംഘത്തിന്റെ നേതൃത്വത്തില്‍ എല്ലാ വര്‍ഷവും അനുസ്മരണം നടക്കും. അനുസ്മരണ പരിപാടിയോട് അനുബന്ധിച്ച് ഐ.ടി.ബി.പി ഉപയോഗിക്കുന്ന വിവിധ ഇനം തോക്കുകളുടെ പ്രദര്‍ശനവുമുണ്ടാകും. തോക്കുകളുടെ ഉപയോഗ രീതി, അളവ്, ഭാരം തുടങ്ങിയവയുടെ വിശദീകരണവും ഇതോടൊപ്പം നടക്കും.