വയനാട്: വയനാട്ടിലെ ദുരന്തബാധിത മേഖലകള്‍ ഒരോന്നായി സന്ദര്‍ശിച്ച് ദുരിതാശ്വാസ ക്യാംപിലുള്ളവര്‍ക്ക് ആശ്വാസവും സന്തോഷവും പകര്‍ന്ന് രാഹുല്‍ഗാന്ധി. പലപ്പോഴും തന്റെ അംഗരക്ഷകരുടെ നിര്‍ദേശങ്ങള്‍ മറികടന്ന് ജനങ്ങളെ ചേര്‍ത്തുപിടിച്ചും മലയാളത്തില്‍ തന്നെ അവരെ ആശ്വസിപ്പിക്കാന്‍ ശ്രമിച്ചുമാണ് വിവിധ സ്ഥലങ്ങളിലെ സന്ദര്‍ശനം പൂര്‍ത്തിയാക്കുന്നത്. നീറുന്ന ഓര്‍മകള്‍ക്കിടയിലും തങ്ങളുടെ എം.പിയെ കണ്ട് പരാതികള്‍ അറിയിക്കാന്‍ കഴിഞ്ഞതിന്റെ സന്തോഷവും രാഹുല്‍ ഗാന്ധി തങ്ങളോട് സംസാരിച്ചതിലുള്ള അവേശവും പലരുടേയും മുഖത്ത് പ്രകടമായിരുന്നു.

[playlist type="video" ids="765041"]

കേരളത്തിലുണ്ടായ ദുരിതത്തെ ഒരുമിച്ച് നേരിടുമെന്നാണ് അദ്ദേഹം മാധ്യമങ്ങളോട് പറഞ്ഞത്. മഴക്കെടുതി വലിയ ദുരന്തമാണ് ഉണ്ടാക്കിയതെങ്കിലും ഭാവിയെ കുറിച്ച് ആരും ആശങ്കപ്പെടരുതെന്ന് രാഹുല്‍ ഗാന്ധി ക്യാംപിലുള്ളവരോട് പറഞ്ഞു.കോഴിക്കോട് കൈതപ്പൊയിലിലാണ് രാഹുല്‍ തിങ്കളാഴ്ച ആദ്യ സന്ദര്‍ശനത്തിനെത്തിയത്. പിന്നീട് മേപ്പാടിയിലെയും ആനക്കയത്തേയും മുണ്ടേരിയിലെയും ക്യാംപുകളിലെത്തി.

ഉരുള്‍പൊട്ടല്‍ വന്‍നാശം വിതച്ച പുത്തുമലയില്‍ അംഗരക്ഷകരുടെ നിര്‍ദേശം അവഗണിച്ചാണ് അദ്ദേഹം എത്തി സ്ഥിതിഗതികള്‍ മനസ്സിലാക്കിയത്. കേരളത്തിലെ പ്രളയ ദുരിതത്തെ കുറിച്ച് പ്രധാനമന്ത്രിയുമായും മുഖ്യമന്ത്രിയുമായും ചര്‍ച്ച നടത്തിയതായി അദ്ദേഹം പറഞ്ഞു.