ലക്‌നോ: ഉത്തര്‍പ്രദേശിലെ പ്രധാന നഗരങ്ങളിലൊന്നായ അലഹബാദിന്റെ പേര് മാറ്റി പ്രയാഗ് രാജ് എന്നാക്കുന്നു. മുഖ്യമന്ത്രി യോഗി ആദിത്യനാഥ് തന്നെയാണ് ഇക്കാര്യം പ്രഖ്യാപിച്ചത്. ഗവര്‍ണര്‍ രാംനായിക്ക് അനുമതി നല്‍കിയതായി ആദിത്യനാഥ് വ്യക്തമാക്കി. കുംഭമേളയ്ക്ക് മുന്നോടിയായി പേര് മാറ്റം നടപ്പാക്കും. അഖില ഭാരതീയ അഖാഡ പരിഷത്ത് ആവശ്യപ്പെട്ടതുപ്രകാരമാണ് നടപടി.

അലഹബാദിന്റെ പഴയ പേര് പ്രയാഗ് എന്നായിരുന്നുവെന്നും 16-ാം നൂറ്റാണ്ടില്‍ മുഗള്‍ രാജാവ് അക്ബര്‍ ഗംഗാ യമുനാ സംഗമസ്ഥാനത്ത് കോട്ട പണിതതോടെ അതിന് 'ഇലാഹ് ആബാദ്'(ദൈവത്തിന്റെ നാട്) എന്ന് പേരിടുകയും ചെയ്യുകയായിരുന്നുവെന്നാണ് ചരിത്രം.

മുഗള്‍ ചക്രവര്‍ത്തി ഷാജഹാനാണ് അലഹബാദ് എന്നു പേരുമാറ്റിയത്. ബ്രഹ്മാവ് ആദ്യമായി യാഗം നടത്തിയ സ്ഥലമാണ് പ്രയാഗെന്നും യോഗി പറഞ്ഞു. പ്രയാഗിലെ രാജാവ് എന്ന അര്‍ഥത്തിലാണ് പ്രയാഗ്‌രാജ് എന്ന പേരെന്നും ആദിത്യനാഥ് വ്യക്തമാക്കി.

ഗംഗ, യമുന നദികള്‍ സംഗമിക്കുന്ന സ്ഥലമാണ് അലഹബാദ്. നദീസംഗമസ്ഥലം എന്നര്‍ഥം വരുന്നതാണ് പ്രയാഗ്. ഇതിന്റെ കൂടെ രാജ് ചേര്‍ത്താണ് സ്ഥലത്തിന്റെ പേരുമാറ്റുന്നത്.