പെരിന്തല്‍മണ്ണ: 3.22  കോടിയുടെ നിരോധിച്ച നോട്ടുകളുമായി അഞ്ചംഗ സംഘം പെരിന്തല്‍മണ്ണയില്‍ പിടിയിലായി. പണം കടത്താനുപയോഗിച്ചിരുന്ന ഡല്‍ഹി രജിസ്‌ട്രേഷനിലുള്ള കാറും ഒരു ബൈക്കും കസ്റ്റഡിയിലെടുത്തിട്ടുണ്ട്.  നിരോധിച്ച 1000,500 നോട്ടുകളടങ്ങിയ 3,22,27,500 രൂപയാണ് പിടികൂടിയത്.   നോട്ടുകളുമായി അഞ്ചംഗ സംഘം  കോഴിക്കോട്ടു  നിന്ന് പാലക്കാട്ടേക്ക് കാറിലും ബൈക്കിലുമായി പോകുന്നുവെന്ന രഹസ്യവിവരത്തെ തുടര്‍ന്നായിരുന്നു അറസ്റ്റ്.  ജില്ലാ പൊലിസ് മേധാവി ദേബേഷ് കുമാര്‍ ബെഹ്‌റയ്ക്ക് ലഭിച്ച രഹസ്യ വിവരത്തെ തുടര്‍ന്ന് നടന്ന അന്വേഷണത്തിലാണ് പ്രതികളെ പെരിന്തല്‍മണ്ണ തറയില്‍ ബസ് സ്റ്റാന്‍ഡ് പരിസരത്ത് നിന്ന് പിടികൂടിയത്. നാദാപുരം ചാലപ്പുറം സ്വദേശി ഒതിയാത്ത് ഷംസുദ്ദീന്‍ (42) കൊളത്തൂര്‍ കുറുപ്പത്താല്‍ പൂവാലപ്പടി മുഹമ്മദ് ഇര്‍ഷാദ് (22)കുറുപ്പത്താല്‍ സ്വദേശി കുന്നിന്‍പുറത്ത് വീട്ടില്‍ മുഹമ്മദ് നജീബ്(42) കോഴിക്കോട് പുതിയങ്ങാടി ചന്ദ്രാലയം വീട്ടില്‍ റിജു(37) കോഴിക്കോട് പന്നിയങ്കര സ്വദേശി ഹാഷിം മഞ്ചിലി(32) എന്നിവരാണ് പിടിയിലായത്.
 പ്രതികള്‍ ഹവാല ഇടപാടുകള്‍ നടത്തുന്നവരാണോ എന്നതിനെകുറിച്ചും നിരോധിച്ച നോട്ടുകള്‍ കടത്തിയത്  എന്തിന് വേണ്ടിയാണെന്നും സൈബര്‍സെല്ലിന്റെയും മറ്റും സഹായത്തോടെ  കൂടുതല്‍ അന്വേഷണം നടത്തുമെന്ന് ജില്ലാ പൊലിസ് മേധാവി ദേബേഷ്‌കുമാര്‍ ബെഹ്‌റ അറിയിച്ചു . സംഘത്തിന് തമിഴ്‌നാട് , കര്‍ണ്ണാടക, എന്നീ സംസ്ഥാനങ്ങളിലുള്ള ബന്ധങ്ങളെ കുറിച്ച് പൊലിസ് അന്വേഷിച്ചു വരുന്നുണ്ട്.  അറസ്റ്റ് ചെയ്ത പ്രതികളെ പെരിന്തല്‍മണ്ണ ഫസ്റ്റ് ക്ലാസ് മജിസ്‌ട്രേറ്റ ്‌കോടതിയില്‍ ഹാജരാക്കും.
ടൗണ്‍ ഷാഡോ ടീമിലെ എസ്.ഐ മാരായ  നരേന്ദ്രന്‍, കെ.സുരേന്ദ്രന്‍ എ.എസ്.ഐ സി.പി. മുരളി, പി.എന്‍ മോഹനകൃഷ്ണന്‍, എന്‍.ടി കൃഷ്ണകുമാര്‍, ദിനേഷ് കിഴക്കേക്കര, മോഹന്‍ദാസ് പി, എം. മനോജ്്, രത്‌നാകരന്‍ എന്നിവരടങ്ങിയ  സംഘമാണ് പ്രതികളെ അറസ്റ്റ് ചെയ്തത്.