തേഞ്ഞിപ്പലം: പ്രളയത്തില്‍ ബുക്കുകള്‍ നഷ്ടപ്പെട്ട വിദ്യാര്‍ഥികള്‍ക്കായി വി.എച്ച്.എസ്.ഇ നാഷനല്‍ സര്‍വിസ് സ്‌കീമിന്റെ 'സ്‌നേഹാക്ഷരം' പദ്ധതിയുടെ ഭാഗമായി നോട്ടുബുക്കുകള്‍ നിര്‍മിച്ചുനല്‍കിയ ചേളാരി ഗവ. വൊക്കേഷനല്‍ ഹയര്‍സെക്കന്‍ഡറി സ്‌കൂള്‍ വി.എച്ച്.എസ്.ഇ എന്‍.എസ്എസ് യൂനിറ്റിനെ ജില്ലാ പഞ്ചായത്ത് ഉപഹാരം നല്‍കി ആദരിച്ചു. വി.എച്ച്.എസ്.ഇ പ്രിന്റിങ് ടെക്‌നോളജി വിദ്യാര്‍ഥികളുടെ സഹായത്തോടെ സ്‌കൂളില്‍ നിലവിലുള്ള ലാബ് സൗകര്യങ്ങള്‍ ഉപയോഗിച്ചാണ് എന്‍.എസ്.എസ് യൂനിറ്റ് ബുക്ക് നിര്‍മാണം പൂര്‍ത്തിയാക്കിയത്.
ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷണനില്‍നിന്ന് വി.എച്ച്.എസ്.ഇ പ്രിന്‍സിപ്പല്‍ എ. ജിനേഷ്, എന്‍.എസ്.എസ് യൂനിറ്റ് ലീഡര്‍മാരായ സാന്ദ്ര, സിനാന്‍, പ്രോഗ്രാം ഓഫിസര്‍ എം. പ്രസാദ് എന്നിവര്‍ ചേര്‍ന്ന് ജില്ലാ പഞ്ചായത്തിന്റെ ഉപഹാരം കൈപ്പറ്റി.
ജില്ലാ പഞ്ചായത്ത് ഓഫിസില്‍ നടന്ന ചടങ്ങില്‍ വൈസ് പ്രസിഡന്റ് സക്കീന പുല്‍പ്പാടന്‍, വികസന കാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ ഉമ്മര്‍ അറയ്ക്കല്‍, സെക്രട്ടറി പ്രീതി മേനോന്‍, മെമ്പര്‍മാരായ എ.കെ അബ്ദുറഹ്മാന്‍, ബക്കര്‍ ചെര്‍നൂര്‍, പി.ടി.എ വൈസ് പ്രസിഡന്റ് പി.എം മുഹമ്മദ്കുട്ടി സംബന്ധിച്ചു.