കോഴിക്കോട്: ടീമിന്റെ രണ്ടാം ഐലീഗ് ടൂര്‍ണമെന്റ് അവിസ്മരണീയമാക്കാനൊരുങ്ങി ഗോകുലം എഫ്.സി. ആദ്യ സീസണിന്റെ തുടക്കത്തില്‍ ടീമിന് മങ്ങലേറ്റുവെങ്കിലും ടൂര്‍ണമന്റിന്റെ അവസാനത്തില്‍ മികച്ച പ്രകടനം കാഴ്ചവയ്ക്കാന്‍ ടീമിനായി. കെ.പി.എല്ലില്‍ ഗോകുലത്തിന് കിരീടം നേടാനും സാധിച്ചു. രണ്ടാം സീസണില്‍ കിരീടം നേടുന്നതിനായി കൂടുതല്‍ താരങ്ങളെ ടീമിലെത്തിച്ചിരുന്നു. തുടര്‍ന്ന് സ്‌പെയിനില്‍ നിന്നുള്ള കോച്ചിനെയും ടീം ഏല്‍പ്പിച്ചിരുന്നു. എന്നാല്‍ സൂപ്പര്‍ കപ്പില്‍ ടീം പരാജയമായതിനെ തുടര്‍ന്ന് സ്പാനിഷ് കോച്ചിന്റെ സ്ഥാനം തെറിക്കുകയായിരുന്നു. തുടര്‍ന്ന് നേരത്തെ ചുമതലയുണ്ടായിരുന്ന ബിനോ ജോര്‍ജിന് തന്നെ ചുമതല നല്‍കുകയായിരുന്നു. ഇര്‍ഷാദ് അടക്കമുള്ള ചില മലയാളി താരങ്ങള്‍ ഗോകുലത്തില്‍നിന്ന് മാറിയെങ്കിലും കൂടുതല്‍ കരുത്തുറ്റ വിദേശ താരങ്ങളെ ഗോലകും ടീമിലെത്തിച്ചിട്ടുണ്ട്. ഹോം ഗ്രൗണ്ടായ കോഴിക്കോട് കോര്‍പറേഷന്‍ സ്റ്റേഡിയത്തില്‍ ഇതിനോടകം തന്നെ ടീം പരീശീലനം തുടങ്ങിയിട്ടുണ്ട്. പുതിയ സീസണില്‍ മികച്ച പ്രകടനം ലക്ഷ്യമിട്ട് തന്നെയാണ് ബിനോ ടീമിനെ ഒരുക്കുന്നത്.