ശാസ്താംകോട്ട: വിവാഹ സദ്യക്കെന്ന വ്യാജേന പാത്രങ്ങള്‍ വാടയ്ക്ക് എടുത്തതിനു ശേഷം മറിച്ചു വിറ്റ് മുങ്ങി നടന്ന വിരുതന്‍ പൊലിസ് പിടിയിലായി. കാറില്‍ വാടക പാത്രവുമായി പോകുമ്പോള്‍ മുമ്പ് പാത്രം നഷ്ടപ്പെട്ട ഉടമയുടെ ശ്രദ്ധയില്‍പ്പെടുകയും ഉടന്‍ പൊലിസില്‍ വിവരം അറിയിക്കുകയുമായിരുന്നു. ഒരു വര്‍ഷമായി താലൂക്കിന്റെ വിവിധ ഭാഗങ്ങളിലെ കടകളില്‍ നിന്ന് പത്തോളം മോഷണമാണ് ഇയാള്‍ ഈ തരത്തില്‍ നടത്തിയത്. കാറില്‍ എത്തി വാര്‍പ്പ്, ചെമ്പ്, ഉരുളി എന്നിവ വാടയ്ക്ക് എടുക്കും. ഈ സാധനങ്ങള്‍ തിരികെ കൊടുക്കാതെ മറിച്ചുവില്‍ക്കും. സാധനങ്ങള്‍ കൊണ്ടു പോകുന്നതിന് ഉപയോഗിക്കുന്ന കാറും വാടയ്ക്കു എടുക്കുന്നതാണ് ഇയാളുടെ പതിവ്.