കോടഞ്ചേരി: മതസൗഹാര്‍ദത്തിന്റെ പുതു ചരിതം രചിക്കുകയാണ് എസ്.കെ.എസ്.എസ്.എഫ് കോഴിക്കോട് ജില്ലാ കമ്മിറ്റി. ചെമ്പുകടവിലെ എരമംഗലം ഉണ്ണി ചോയിയുടെ കുടുംബത്തിന് ഒരു ലക്ഷത്തോളം വിലവരുന്ന വീട്ടുപകരണങ്ങള്‍ നല്‍കിയാണ് ജില്ലാ കമ്മിറ്റി മാതൃകയായത്.

കഴിഞ്ഞ ആഴ്ചയാണ് ഉണ്ണി ചോയിയും കുടുംബവും താമസിക്കുന്ന വീട് നിലംപൊത്തിയത്. മലവെള്ളപാച്ചിലില്‍ തൊട്ടടുത്ത മൂന്ന് വീടുകളില്‍ വെള്ളം കയറുന്നത് കണ്ട് ഇവരുടെ മകന്റെ ഭാര്യ അനിഷ എല്ലാവരെയും തന്റെ വീട്ടിലേക്ക് കൂട്ടികൊണ്ട് വന്നു. അല്‍പ്പസമയത്തിനകം ഇവരെ പാര്‍പ്പിച്ച വീടിനു പിന്നിലെ മണ്ണ് ഇടിഞ്ഞു വീഴുകയായിരുന്നു. പെട്ടെന്ന് പുറത്തേക്ക് ചാടിയതിനാല്‍ ഇവര്‍ അല്‍ഭുതകരമായി രക്ഷപ്പെടുകയായിരുന്നു.

വീടും വീട്ടുപകരണങ്ങളും പൂര്‍ണമായും തകര്‍ന്നു. പിന്നീട് വാടക വീട്ടിലേക്ക് താമസം മാറിയ ഉണ്ണി ചോയിക്കും കുടുംബത്തിനും ആവശ്യമായ കട്ടിലുകള്‍, അലമാര, ബെഡുകള്‍, കസേരകള്‍, മിക്‌സി, പ്രഷര്‍കുക്കര്‍ ഉള്‍പ്പടെയുള്ള പാത്രങ്ങള്‍ മുതലായവയാണ് എസ്.കെ.എസ്.എസ്.എഫ് ജില്ലാ കമ്മിറ്റി നല്‍കിയത്.
ചെമ്പുകടവില്‍ നടന്ന പരിപാടിയില്‍ ജില്ലാ പ്രസിഡന്റ് സയ്യിദ് മുബശ്ശിര്‍ തങ്ങള്‍ ജമലുല്ലൈലി ഉണ്ണി ചോയിക്ക് വീട്ടുപകരണങ്ങള്‍ കൈമാറി. സംസ്ഥാന വൈസ് പ്രസിഡന്റ് കുഞ്ഞാലന്‍കുട്ടി ഫൈസി, ജില്ലാ ജനറല്‍ സെക്രട്ടറി ഒ.പി അശ്‌റഫ് മൗലവി, കെ.വി.നൂറുദ്ദീന്‍ ഫൈസി, ഫൈസല്‍ ഫൈസി മടവൂര്‍, സ്വാലിഹ് നിസാമി എളേറ്റില്‍,സുബൈര്‍ മാസ്റ്റര്‍, അലി അക്ബര്‍ കറുത്തപറമ്പ്, അംജദ് ഖാന്‍ റശീദി, മിദ്‌ലാജ് താമരശേരി, റഫീഖ് മാസ്റ്റര്‍ പെരിങ്ങൊളം, ജാബിര്‍ കൈതപ്പൊയില്‍, റഹീം ആനകുഴിക്കര, ശറഫുദ്ദീന്‍ കൊട്ടാരക്കോത്ത്, ശഫീഖ് ചെമ്പുകടവ്, ഫാസില്‍ നൂറാം തോട്, വില്ലേജ് ഓഫീസര്‍ പ്രഭാകരന്‍ നായര്‍ സംബന്ധിച്ചു.

https://www.youtube.com/watch?v=DhRY0QVkCIY