കോട്ടയം: ശ്രീറാം വെങ്കിട്ടരാമന്‍ കാറിടിച്ച് കൊലപ്പെടുത്തിയ മാധ്യമപ്രവര്‍ത്തകന്‍ കെ.എം ബഷീറിന്റെ കുടുംബത്തെ കേന്ദ്രസര്‍ക്കാരിന്റെ പദ്ധതിയില്‍പ്പെടുത്തി സഹായിക്കാന്‍ നടപടി സ്വീകരിക്കുമെന്ന് കേന്ദ്രമന്ത്രി വി. മുരളീധരന്‍. കേന്ദ്രസര്‍ക്കാരിന്റെ ജേണലിസ്റ്റ് വെല്‍ഫെയര്‍ സ്‌കീമില്‍ ഉള്‍പ്പെടുത്തിയാകും സഹായം ലഭ്യമാക്കുക.
അപേക്ഷ ലഭിക്കുന്നതിന് അനുസരിച്ച് ഈ സ്‌കീമില്‍ ലഭ്യമാകുന്ന പരമാവധി സഹായം നല്‍കും. കഴിഞ്ഞവര്‍ഷം പ്രളയക്കെടുതി റിപ്പോര്‍ട്ട് ചെയ്യാന്‍ പോകുന്നതിനിടെ രണ്ട് മാധ്യമപ്രവര്‍ത്തകര്‍ വള്ളംമറിഞ്ഞ് മരിച്ച സംഭവത്തിലും ആവശ്യമായ ഇടപെടല്‍ നടത്തും. മുണ്ടാറില്‍ മുങ്ങിമരിച്ച മാധ്യമപ്രവര്‍ത്തകരായ സജിയുടെയും ബിപിന്റെയും കുടുംബത്തിന്റെ അപേക്ഷയിലുള്ള തീരുമാനം വേഗത്തിലാക്കുമെന്നും അദ്ദേഹം കൂട്ടിച്ചേര്‍ത്തു.