കണ്ണൂര്‍: കതിരൂര്‍ പഞ്ചായത്ത് ഹോമിയോപ്പതി പാലിയേറ്റീവ് കെയര്‍ പദ്ധതിയുടെ ഉദ്ഘാടനം എ.എന്‍ ഷംസീര്‍ എം.എല്‍.എ നിര്‍വഹിച്ചു. ജില്ലയില്‍ ആദ്യമായാണ് ഹോമിയോ ആശുപത്രിയുടെ നേതൃത്വത്തില്‍ പാലിയേറ്റീവ് കെയര്‍ ആരംഭിക്കുന്നത്. കതിരൂര്‍ ഗവ. ഹോമിയോ ഡിസ്‌പെന്‍സറിയുടെ ആഭിമുഖ്യത്തിലാണ് പരിപാടി സംഘടിപ്പിച്ചത്.
പഞ്ചായത്ത് പരിധിയിലെ ഹോമിയോ ചികിത്സ നേടുന്നവരും കിടപ്പ് രോഗികളും കാന്‍സര്‍ രോഗികളുമാണ് ഈ പദ്ധതിയിലുള്‍പ്പെടുന്നത്. എല്ലാ ആഴ്ചയിലും ബുധനാഴ്ച ജെറിയാട്രിക് പാലിയേറ്റീവ് സ്‌പെഷ്യല്‍ ഒ.പി ഒന്‍പത് മുതല്‍ 11.30 വരെ വൃദ്ധജനങ്ങള്‍ക്കും കാന്‍സര്‍ രോഗികള്‍ക്കുമായി പ്രവര്‍ത്തിക്കും. ആഴ്ചയിലൊരിക്കല്‍ ബുധനാഴ്ച 9.30 മുതല്‍ 2.30 വരെ പാലിയേറ്റീവ് ഹോം കെയറിനായി നീക്കി വയ്ക്കും. അന്ന് കിടപ്പിലായ രോഗികളെ വീടുകളില്‍ ചെന്ന് സന്ദര്‍ശിക്കും.
പഞ്ചായത്ത് പ്രസിഡന്റ് എം. ഷീബ അധ്യക്ഷയായി. ജില്ലാ മെഡിക്കല്‍ ഓഫീസര്‍ ഡോ.ഇ.എന്‍ രാജു എയര്‍ബെഡ് വിതരണം ചെയ്തു. ടി.ടി റംല, എ.ടി സുരേഷ്, വി.കെ ലഹിജ, കെ. സുഗീഷ് പങ്കെടുത്തു.