കോഴിക്കോട്: അടുത്ത മാസം കാനഡയില്‍ നടക്കുന്ന ലോകകപ്പ് സോഫ്റ്റ്‌ബോള്‍ ചാംപ്യന്‍ഷിപ്പിന് യോഗ്യത നേടിയ ഇന്ത്യന്‍ ടീമില്‍ അംഗമായ പി.പി അജ്മലിന് കോസ്‌മോസ് സ്‌പോര്‍ട്‌സ് ഒരു ലക്ഷം രൂപ കൈമാറി. കോസ്‌മോസ് സ്‌പോര്‍ട്‌സ് കോ. ചെയര്‍മാന്‍ എ.കെ ഫൈസല്‍ വാഗ്ദാനം ചെയ്ത തുക ഇന്നലെ കോര്‍പറേറ്റ് ഓഫിസില്‍ നടന്ന ചടങ്ങില്‍ കോസ്‌മോസ് സ്‌പോര്‍ട്‌സ് വേള്‍ഡ് ചെയര്‍മാന്‍ എ.കെ നിഷാദ് അജ്മലിന്റെ മാതാവ് മെഹജബിന് കൈമാറി. കാലിക്കറ്റ് പ്രസ്‌ക്ലബ് പ്രസിഡന്റ് കമാല്‍ വരദൂര്‍ അധ്യക്ഷനായി.
ലോകകപ്പിന് യോഗ്യത നേടിയിട്ടും സാമ്പത്തിക പ്രയാസങ്ങള്‍ കാരണം അജ്മലിന്റെ യാത്ര പ്രതിസന്ധിയിലായിരുന്നു. ഇക്കാര്യം ശ്രദ്ധയില്‍പ്പെടുത്തിയതിനെ തുടര്‍ന്നാണ് എ.കെ ഫൈസല്‍ യാത്രാസഹായം വാഗ്ദാനം ചെയ്തത്. ചടങ്ങില്‍ കോസ്‌മോസ് സ്‌പോര്‍ട്‌സ് വേള്‍ഡ് മാനേജിങ് ഡയറക്ടര്‍ ടി.സി അഹമ്മദ്, യു.എ.ഇയില്‍ നടന്ന ഫിഫ അണ്ടര്‍-17 ലോകകപ്പ് ലോജിസ്റ്റിക്‌സ് മാനേജരായിരുന്ന മലയാളി സി.കെ.പി ഷാനവാസ്, മുഹമ്മദ് അഷ്‌റഫ്, കോസ്‌മോസ് ഡയറക്ടര്‍മാരായ എ.കെ ആദില്‍, പി. നിസാര്‍, പി. നൗഷാദ് സംസാരിച്ചു.