മാഡ്രിഡ്: ഈ സീസണോടെ കരാര്‍ അവസാനിക്കുന്ന സാഹചര്യത്തില്‍ റയല്‍ മാഡ്രിഡില്‍ തുടരില്ലെന്ന് പെപ്പെ. ഇംഗ്ലീഷ് പ്രീമിയര്‍ ലീഗ് ടീമുകള്‍ തന്നെ സമീപിച്ചിട്ടുണ്ടെന്നും പെപ്പെ വ്യക്തമാക്കി. അതേസമയം ക്ലബിന്റെ നടപടികളില്‍ പെപ്പെ പ്രതിഷേധമുണ്ടെന്ന് അദ്ദേഹത്തോടടുത്ത വൃത്തങ്ങള്‍ സൂചിപ്പിച്ചു.
സിദാന്റെ പരിശീലനത്തില്‍ പല മത്സരങ്ങളിലും തഴഞ്ഞത് താരത്തെ ചൊടിപ്പിച്ചിട്ടുണ്ട്. ഇതിനെ തുടര്‍ന്നാണ് ക്ലബില്‍ തുടരേണ്ടതില്ലെന്ന തീരുമാനത്തിലെത്താന്‍ താരത്തെ പ്രേരിപ്പിച്ചത്. ടീമിന്റെ പ്രകടനം മികച്ചതാണെന്ന് വ്യക്തമാക്കിയ പെപ്പെ ടീമിന്റെ ചില നടപടികള്‍ തനിക്ക് തീരെ ഇഷ്ടപ്പെടുന്നില്ലെന്ന് തുറന്നടിച്ചു. താന്‍ ടീമില്‍ നിന്ന് പെട്ടെന്ന് ഇല്ലാതായത് എന്തുകൊണ്ടാണെന്ന് മനസിലായിട്ടില്ലെന്ന് പെപ്പെ പറഞ്ഞു.
ക്ലബില്‍ തന്റെ സേവനം അവസാനിപ്പിക്കേണ്ട സമയമായി. എന്നാല്‍ റയല്‍ തന്നോട് ചെയ്തത് ഒരിക്കലും ശരിയല്ല. പക്ഷേ പുതിയ ടീമിനായി താന്‍ ഉടന്‍ കളിക്കുമെന്നും പെപ്പെ പറഞ്ഞു.
അതേസമയം ഫ്രഞ്ച് ക്ലബായ പി.എസ്.ജിയും ഇറ്റാലിയന്‍ ക്ലബായ ഇന്റര്‍മിലാനും താരത്തിനായി രംഗത്തുണ്ടെന്ന് സൂചനയുണ്ട്. ഈ ക്ലബുകളേക്കാള്‍ താന്‍ മുന്‍തൂക്കം നല്‍കുന്നത് പ്രീമിയര്‍ ലീഗ് ടീമുകള്‍ക്കാണെന്ന് പെപ്പെ സൂചിപ്പിച്ചു. എന്നാല്‍ ആരുമായും കരാര്‍ ഒപ്പിട്ടിട്ടില്ല. നേരത്തെ തന്നെ അത് ചെയ്യേണ്ടതായിരുന്നു. പക്ഷേ ടീമില്‍ അസ്ഥിരത ഉണ്ടാക്കേണ്ടെന്ന് കരുതിയാണ് അതിന് മുതിരാതിരുന്നതെന്നും പെപ്പെ കൂട്ടിച്ചേര്‍ത്തു.