ന്യൂഡല്‍ഹി: മുന്‍വര്‍ഷങ്ങളെ അപേക്ഷിച്ച് മഴയുടെ അളവ് ഇത്തവണ കൂടുമെന്ന് കാലാവസ്ഥാ നിരീക്ഷണ കേന്ദ്രം. മുന്‍കാലത്തേതിനേക്കാള്‍ 96 ശതമാനം അധികം മഴ ഇത്തവണയുണ്ടാകുമെന്ന് കഴിഞ്ഞ ഏപ്രിലില്‍ പുറത്തിറക്കിയ റിപ്പോര്‍ട്ടില്‍ കാലാവസ്ഥാ നിരീക്ഷണ കേന്ദ്രം അറിയിച്ചിരുന്നു. എന്നാല്‍, ഇന്നലെ പുറത്തിറക്കിയ റിപ്പോര്‍ട്ടില്‍ മഴയുടെ തോത് 98 ശതമാനം കൂടുമെന്നാണ് പറയുന്നത്.
ഇത്തവണ എല്‍നിനോ പ്രതിഭാസം കാര്യമായ സ്വാധീനം ചെലുത്തില്ലെന്ന് കാലാവസ്ഥാ നിരീക്ഷണ കേന്ദ്രം ഡയരക്ടര്‍ ജനറല്‍ കെ.ജെ രമേശ് പറഞ്ഞു. എല്‍നിനോയെത്തുടര്‍ന്ന് ശാന്ത സമുദ്രത്തില്‍ ചൂട് വര്‍ധിച്ചതാണ് കഴിഞ്ഞ മണ്‍സൂണില്‍ മഴ കുറയാന്‍ കാരണമായത്. ഉത്തരേന്ത്യന്‍ സംസ്ഥാനങ്ങളില്‍ ഇപ്പോള്‍ ചൂട് വര്‍ധിച്ചിട്ടുണ്ടെങ്കിലും രണ്ടു ദിവസത്തിനകം മഴ പെയ്യും.