ന്യൂഡല്‍ഹി: കശ്മീര്‍ വിഷയത്തില്‍ ആദ്യമായി പ്രതികരിച്ച് ഇറാന്‍ നേതാവ് ആയത്തുള്ള ഖമൈനി. തങ്ങളുമായി ഏറെ സൗഹൃദത്തിലുള്ള രാജ്യമാണ് ഇന്ത്യയെന്നും അത്‌കൊണ്ടു തന്നെ കശ്മീരില്‍ ഇപ്പോള്‍ നടക്കുന്ന പ്രശ്‌നങ്ങല്‍ ഏറെ താല്‍പര്യത്തോടെയാണ് വീക്ഷിക്കുന്നതെന്നും അദ്ദേഹം പറഞ്ഞു.

കശ്മീരില്‍ ഇപ്പോള്‍ നിലനില്‍ക്കുന്ന പ്രതിസന്ധിയും ഇന്ത്യയും പാക്കിസ്ഥാനും തമ്മിലുള്ള പ്രശ്‌നങ്ങളും ബ്രിട്ടീഷ് സാമ്രാജ്യത്വം ഇന്ത്യവിട്ട് പോകുമ്പോള്‍ സ്വീകരിച്ച നടപടികളുടെ ഭാഗമായാണെന്ന് അദ്ദേഹം കുറ്റപ്പെടുത്തി. കശ്മീരിലെ മുസ്ലിങ്ങളുടെ ഇപ്പോഴത്തെ സാഹചര്യത്തില്‍ ഞങ്ങള്‍ക്ക് ആശങ്കയുണ്ട്. ഇവര്‍ക്കെതിരേ നടക്കുന്ന അടിച്ചമര്‍ത്തലുകള്‍ക്കെതിരേ ഒരു പ്രത്യേക നയം സ്വീകരിക്കാന്‍ രാജ്യം തയാറാവുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്‍ത്തു.

കശ്മീരില്‍ നടത്തിയ നടപടികള്‍ സംബന്ധിച്ച് അന്താരാഷ്ട്ര കോടതിയില്‍ പരാതി നല്‍കുമെന്ന് പാക്കിസ്താന്‍ അറിയിച്ചതിന് പിന്നാലെയാണ് ഖമൈനിയുടെ പ്രസ്താവന പുറത്തുവന്നിരിക്കുന്നത്. കഴിഞ്ഞ ദിവസങ്ങളിലായ നടന്ന യു.എന്‍ സുരക്ഷാ കൗണ്‍സിലില്‍ വിഷയം അവതരിപ്പിച്ചെങ്കിലും ഭൂരിഭാഗം അംഗങ്ങളും അതില്‍ ഇടപെടേണ്ട നിലപാടാണ് സ്വീകരിച്ചത്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപും വിഷയത്തില്‍ മധ്യസ്ഥത വഹിക്കാമെന്ന് പറഞ്ഞ് രംഗത്തുവന്നിരുന്നു.