മുത്തങ്ങ: സംസ്ഥാന അതിര്‍ത്തിയിലെ മുത്തങ്ങ എക്‌സൈസ് ചെക്ക്‌പോസ്റ്റില്‍ വാഹന പരിശോധനക്കിടെ മതിയായ രേഖകളില്ലാതെ കടത്തുകയായിരുന്ന 80 ലക്ഷം രൂപയുമായി രണ്ട് പേര്‍ പിടിയില്‍. മഹാരാഷ്ട്ര സാഗ്‌ളി സ്വദേശികളായ ശങ്കര്‍ വിത്തല്‍ ഖണ്ഡാരെ (23), രോഹിത് ഉമേഷ് (19) എന്നിവരാണ് പിടിയിലായത്. ഇവരില്‍നിന്ന് 80,41,450 രൂപയാണ് പിടികൂടിയത്. ഇവരുടെ കൈവശമുണ്ടായിരുന്ന ബാഗിലാണ് പണം സൂക്ഷിച്ചിരുന്നത്.

ഹൈദരാബാദില്‍നിന്ന് കോഴിക്കോട്ടേക്ക് വരികയായിരുന്ന ബസില്‍വച്ചാണ് ഇന്നലെ രാവിലെ 11.30 ഓടെ മതിയായ രേഖകളില്ലാത്ത പണവുമായി മുത്തങ്ങ എക്‌സൈസ് ചെക്ക്‌പോസ്റ്റ് അധികൃതര്‍ ഇവരെ പിടികൂടിയത്.
മംഗലാപുരത്ത് ജ്വല്ലറി ജീവനക്കാരാണെന്നും കണ്ണൂര്‍ - കൂട്ടുപുഴ റോഡ് ബ്ലോക്ക് ആയതിനാല്‍ മുത്തങ്ങ വഴി വന്നതാണന്നും പണം ജ്വല്ലറി ഉടമയായ ഗണേഷ് എന്നയാള്‍ക്ക് കൈമാറുന്നതിനായാണ് കൊണ്ടുവന്നതെന്നുമാണ് പിടിയിലായവര്‍ ചോദ്യം ചെയ്യലില്‍ പറഞ്ഞതെന്ന് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.എം മജു അറിയിച്ചു. പിടിയിലായവരെയും പണവും പിന്നീട് പൊലിസിന് കൈമാറി.
പരിശോധനയ്ക്ക് എക്‌സൈസ് ഇന്‍സ്‌പെക്ടര്‍ ബൈജു, പി.ഇ.ഒ ശശികുമാര്‍, സി.ഇ.ഒമാരായ രജിത്, ജോഷി, ജലജ, പ്രീജ എന്നിവരുമുണ്ടായിരുന്നു.