മലപ്പുറം: ജില്ലയില്‍ വിവിധ അങ്കണവാടികള്‍ പ്രവേശനോത്സവം സംഘടിപ്പിച്ചു. ജില്ലാതല ഉദ്ഘാടനം മലപ്പുറം കണ്ണത്തുപാറ അങ്കണവാടിയില്‍ നടന്നു. ജില്ലാ കലക്ടര്‍ അമിത് മീണ ഉദ്ഘാടനം ചെയ്തു. മുനിസിപ്പല്‍ ചെയര്‍പേര്‍സണ്‍ സി.എച്ച് ജമീല അധ്യക്ഷയായി. പരിപാടിയോടനുബന്ധിച്ച് ശിശുപരിചരണം, ശിശുപരിപാലനം എന്നിവയില്‍ അങ്കണവാടികളുടെ പ്രാധാന്യം സംബന്ധിച്ച ബോധവല്‍ക്കരണ ക്ലാസും നടന്നു. ഇതോടനുബന്ധിച്ച് വിദ്യാര്‍ഥികളുടെ കലാപരിപാടികളും നടന്നു.
സ്റ്റാന്‍ഡിങ് കമ്മിറ്റി ചെയര്‍മാന്‍ പരി മജീദ്, കൗണ്‍സിലര്‍ പി സലീന, ജില്ലാ സാമൂഹ്യക്ഷേമ ഓഫിസര്‍ കെ.വി സുഭാഷ് കുമാര്‍, ജില്ലാ ചൈല്‍ഡ് പ്രൊട്ടക്ഷന്‍ ഓഫിസര്‍ ഷമീര്‍ മച്ചിങ്ങല്‍, ജില്ലാ പ്രോഗ്രാം ഓഫിസര്‍ കൃഷ്ണമൂര്‍ത്തി പങ്കടുത്തു. ജില്ലയിലെ 3808 അങ്കണവാടികളിലും വിവിധ പരിപാടികള്‍ നടന്നു.