ബ്യൂണസ് ഐറിസ്: മുന്‍ അര്‍ജന്റീന താരവും സാവോ പോളോയുടെ പരിശീലകനുമായ എഡ്ഗാര്‍ഡോ ബൗസയെ അര്‍ജന്റീന ടീമിന്റെ പരിശീലകനായി നിയമിച്ചു. ജെറാര്‍ഡോ മാര്‍ട്ടിനോയ്ക്ക് പകരക്കാരനായിട്ടാണ് ബൗസയെത്തുന്നത്. കഴിഞ്ഞ സീസണില്‍ സാവോ പോളോയുടെ പരിശീലകനായി ബൗസയെ നിയമിച്ചിരുന്നു. എന്നാല്‍ എട്ടു മാസത്തിനു ശേഷം അര്‍ജന്റൈന്‍ ഫുട്‌ബോള്‍ ഫെഡറേഷന്റെ പ്രത്യേക അഭ്യര്‍ഥന പ്രകാരം ബൗസ ടീമിന്റ പരിശീലക സ്ഥാനം ഏറ്റെടുക്കുകയായിരുന്നു.

വെള്ളിയാഴ്ച്ച ടീമിനെ കുറിച്ചും വിരമിച്ച താരം ലയണല്‍ മെസ്സിയെ തിരിച്ചു കൊണ്ടു വരുന്നതുമടക്കമുള്ള നടപടികളെ കുറിച്ചും ബൗസ വാര്‍ത്താ സമ്മേളനം നടത്തുമെന്ന് അര്‍ജന്റൈന്‍ ഫുട്‌ബോള്‍ ഫെഡറേഷന്‍ പ്രസിഡന്റ് അര്‍മാന്‍ഡോ പെരസ് വ്യക്തമാക്കി. നേരത്തെ അത്‌ലറ്റിക്കോ മാഡ്രിഡ് കോച്ച് ഡീഗോ സിമിയോണി, യോര്‍ഗെ സംപോളി, മൗറീഷ്യോ പച്ചെറ്റിനോ എന്നിവരെ കോച്ചിങ് സ്ഥാനത്തിനായി അര്‍ജന്റൈന്‍ ഫെഡറേഷന്‍ സമീപിച്ചിരുന്നു. എന്നാല്‍ ഇവരെല്ലാം വാഗ്ദാനങ്ങള്‍ നിരസിച്ചു. നിരവധിയാളുകളുമായി പരിശീലക സ്ഥാനം സംബന്ധിച്ച് ചര്‍ച്ച നടത്തിയിരുന്നെന്ന് പെരസ് പറഞ്ഞു. എന്നാല്‍ അര്‍ജന്റീനയെ പരിശീലിപ്പിക്കാന്‍ ഏറ്റവും മികച്ചത് ബൗസയാണ്. അദ്ദേഹത്തിനു ടീമിനെ കൂടുതല്‍ വിജയങ്ങളിലേക്ക് നയിക്കാനാവുമെന്ന് പെരസ് കൂട്ടിച്ചേര്‍ത്തു.

സെപ്്റ്റംബറില്‍ നടക്കുന്ന 2018 ലോകകപ്പ് യോഗ്യതാ മത്സരങ്ങളാണ് ബൗസയ്ക്ക് മുന്നില്‍ ആദ്യ വെല്ലുവിളി.