തിരുവനന്തപുരം: ബി.ജെ.പിയുടെ നിലപാടില്‍ ആത്മാര്‍ഥതയില്ലെന്നും കേന്ദ്രം വിചാരിച്ചാല്‍ 24 മണിക്കൂറിനുള്ളില്‍ ശബരിമല പ്രശ്‌നം പരിഹരിക്കാന്‍ സാധിക്കുമെന്നും മുതിര്‍ന്ന കോണ്‍ഗ്രസ് നേതാവ് എ.കെ ആന്റണി. ശബരിമല വിഷയത്തില്‍ ബി.ജെ.പി പ്രധാനമന്ത്രിയെ കാണണമെന്നും ആന്റണി ആവശ്യപ്പെട്ടു.
ശബരിമല യുവതി പ്രവേശന വിഷയത്തിലെ സംസ്ഥാന സര്‍ക്കാറിന്റെ പ്രതികരണങ്ങള്‍ ധൃതി പിടിച്ചതായി. വിധി വന്നപ്പോള്‍ വിശ്വാസികളെ വിശ്വാസത്തില്‍ എടുക്കണമായിരുന്നു. കുറച്ചുകൂടി പക്വമായി സര്‍ക്കാര്‍ വിഷയത്തെ കൈകാര്യം ചെയ്യണമായിരുന്നുവെന്നും ആന്റണി പറഞ്ഞു.
കേരള,കേന്ദ്ര സര്‍ക്കാരുകള്‍ ശബരിമലയെ നശിപ്പിക്കുകയാണ്. കേരള സര്‍ക്കാര്‍ ദേവസ്വം ബോര്‍ഡിനെ അതിന്റെ വഴിക്ക് വിടണമായിരുന്നു. പൊലിസ് നടപടികള്‍ മോശമായി പോയി. കോണ്‍ഗ്രസ് വിശ്വാസികള്‍ക്കൊപ്പമാണെന്നും ആന്റണി പറഞ്ഞു.
ഇന്ത്യയുടെ വൈവിധ്യത്തെ അംഗീകരിക്കാന്‍ സാധിക്കണം. ആചാരങ്ങളെയും അനുഷ്ഠാനങ്ങളെയും അംഗീകരിക്കണം. ഒരു മത വിഭാഗത്തിന്റെയും ആചാരങ്ങളെയും ഒറ്റയടിക്ക് ഇല്ലാതാക്കാന്‍ ശ്രമിച്ചാല്‍ രാജ്യം ചിഹ്നഭിന്നമാകുമെന്നും ആന്റണി പറഞ്ഞു.