ന്യൂഡല്‍ഹി: ഇനി മുതല്‍ ഇന്ധന വില എല്ലാ ദിവസവും പരിഷ്‌കരിക്കും. എണ്ണക്കമ്പനികളുടെ യോഗത്തിലാണ് ഇക്കാര്യത്തില്‍ തീരുമാനമായത്.ജൂണ്‍ 16 മുതല്‍ രാജ്യ വ്യാപകമായി പുതിയ തീരുമാനം നിലവില്‍ വരും. ഇതോടെ എല്ലാ ദിവസവും പെട്രോള്‍,ഡീസല്‍ വിലയില്‍ മാറ്റം വരും.

നേരത്തെ പരീക്ഷണാടിസ്ഥാനത്തില്‍ അഞ്ച് നഗരങ്ങളില്‍ ഇത് നടപ്പാക്കിയിരുന്നു. മെയ് ഒന്നു മുതല്‍ ഇത് പോണ്ടിച്ചേരി, വിശാഘപട്ടണം, ജംഷഡ്പ്പൂര്‍, ചണ്ഡീഗണ്ഡ്, ഉദയ്പൂര്‍ എന്നിവിടങ്ങളിലാണ് പരീക്ഷണാടിസ്ഥാനത്തില്‍ ദിവസേന എണ്ണ വില പുതുക്കി നിശ്ചയിച്ചിരുന്നത്.

ആഗോള വിപണിയുടെ ചുവടുപിടിച്ചാണ് പൊതുമേഖലാ എണ്ണ കമ്പനികളുടെ തീരുമാനം. ദിനം പ്രതി വില നിശ്ചയിക്കുന്നത് തടസ്സമാകില്ലന്നാണ് എണ്ണ കമ്പനികളുടെ വിലയിരുത്തല്‍. നിലവില്‍ എല്ലാമാസവും 15ാം തീയതിയും 30ാം തീയതിയുമായി രണ്ടു തവണയാണ് ഇന്ധന വില പുനര്‍നിര്‍ണയിച്ചിരുന്നത്.