തിരുവനന്തപുരം: ഒ്രാട്ടിസം ബാധിച്ച മൂന്നാം ക്ലാസ് വിദ്യാര്‍ഥിയെ ലൈംഗികമായി പീഡിപ്പിച്ച അദ്ധ്യാപകന്‍ അറസ്റ്റില്‍. സ്‌കൂളിലെ കണക്ക് അധ്യാപകന്‍ ശ്രീകാര്യം സ്വദേശി സന്തോഷ് കുമാറിനെയാണ് അറസ്റ്റ്‌ചെയ്തത്. അധ്യാപകനെ 14 ദിവസത്തേക്ക് കോടതി റിമാന്‍ഡ് ചെയ്തു. സംഭവം മറച്ചു വച്ച ക്ലാസ് ടീച്ചര്‍ക്കെതിരെയും കേസെടുത്തേക്കും. ഇന്നലെ വൈകിട്ട് അഞ്ചരക്ക് മെഡിക്കല്‍ കോളേജ് പരിസരത്ത് നിന്നാണ് പ്രതിയെ പിടി കൂടിയത്.

കഴിഞ്ഞ മാസം 27നാണ് വിദ്യാര്‍ത്ഥിയെ അദ്ധ്യാപകര്‍ ഉപയോഗിക്കുന്ന ബാത്ത് റൂമില്‍ കൊണ്ട് പോയി ഇയാള്‍ പീഡിപ്പിച്ചത്. കുട്ടിയുടെ പെരുമാറ്റത്തില്‍ അസ്വാഭാവികത പ്രകടമായതോടെയാണ് പീഡന വിവരം പുറത്തറിഞ്ഞത്. സംഭവത്തിന് ശേഷം ഒളിവില്‍ പോയ അദ്ധ്യാപകന്‍ മുന്‍കൂര്‍ ജാമ്യത്തിന് അപേക്ഷ നല്‍കിയിരുന്നു. ഇതിനിടയിലാണ് അറസ്റ്റുണ്ടായത്. പീഡനവിവരം കുട്ടി ആദ്യം ക്ലാസ് ടീച്ചറോട് പറഞ്ഞെങ്കിലും ക്ലാസ് ടീച്ചര്‍ ബോധപൂര്‍വ്വം മറച്ചുവച്ചു എന്ന മൊഴിയില്‍ നിയമോപദേശം തേടിയ ശേഷം കേസ് എടുക്കാനാണ് അന്വഷണ സംഘത്തിന്റെ നീക്കം. പ്രതിയെ കൂടുതല്‍ ചോദ്യം ചെയ്യലിനും തെളിവെടുപ്പിനുമായി പോലീസ് കസ്റ്റഡിയില്‍ വാങ്ങും.

പീഡനത്തിന് ഇരയായതായി മെഡിക്കല്‍ ബോര്‍ഡും സ്ഥിരീകരിച്ചിരുന്നു. നേരത്തെ കുട്ടിയുടെ പരാതിയില്‍ വൈദ്യ പരിശോധനയും രഹസ്യമൊഴിയും രേഖപ്പെടുത്തിയെങ്കിലും പോലീസിനോടും മജിസ്‌ട്രേറ്റിനോടും കുട്ടി കൊടുത്ത മൊഴിയില്‍ പീഡനം നടന്ന സ്‌കൂളിനുള്ളിലെ സ്ഥലം സംബന്ധിച്ച് വൈരുദ്ധ്യമുണ്ടായിരുന്നു. എന്നാല്‍ കഴിഞ്ഞ ദിവസം ചൈല്‍ഡ് വെല്‍ഫെയര്‍ കമ്മിറ്റിയുടെ കീഴില്‍ ഒരു വിദഗ്ധ ടീമിനെ കൊണ്ട് കുട്ടിയുടെ മൊഴി വീണ്ടും രേഖപ്പെടുത്തുകയായിരുന്നു. ഈ പരിശോധനയിലാണ് പീഡന കാര്യം ബോര്‍ഡ് സ്ഥിരീകരിച്ചത്.

teacher arrested for sodomsing autistic child