കൊച്ചി: ആവേശപ്പെരുമ സൃഷ്ടിച്ച മഞ്ഞപ്പടയുടെ ആരവങ്ങള്‍ക്കൊപ്പം ഉയരാനാകാതെ വിജയസ്വപ്നം വീണ്ടും അവശേഷിപ്പിച്ച് കേരള ബ്ലാസ്റ്റേഴ്‌സ് രണ്ടാമങ്കവും സമനിലയില്‍ അവസാനിപ്പിച്ചു. സ്റ്റേഡിയത്തില്‍ നിറഞ്ഞുകവിഞ്ഞ കാണികളെ ഒരിക്കല്‍ കൂടി നിരാശയിലാക്കിയാണ് കേരള ബ്ലാസ്റ്റേഴ്‌സ് ജയമുറപ്പിച്ച മത്സരം 84ാം മിനുട്ടില്‍ കൈവിട്ടത്.
കൊച്ചി ജവഹര്‍ലാല്‍ നെഹ്‌റു സ്റ്റേഡിയത്തില്‍ ഡല്‍ഹി ഡൈനാമോസിനെതിരേ നടന്ന മത്സരത്തിലാണ് കേരള ബ്ലാസ്റ്റേഴ്‌സ് 1-1 സമനില പാലിച്ചത്. മൂന്ന് കളികളില്‍ നിന്നായി അഞ്ച് പോയിന്റ് നേടിയ കേരള ബ്ലാസ്‌റ്റേഴ്‌സ് സമനിലയോടെ പോയിന്റ് പട്ടികയില്‍ നാലില്‍ നിന്ന് രണ്ടാം സ്ഥാനത്തെത്തി. ആദ്യപകുതിയില്‍ കളിമറന്ന കേരളത്തിന്റെ കൊമ്പന്മാര്‍ രണ്ടാം പകുതിയില്‍ ഉണര്‍ന്ന് കളിച്ചെങ്കിലും സി.കെ വിനീത് 48-ാം മിനിട്ടില്‍ നേടിയ ഗോളിന്റെ മേല്‍ക്കൊയ്മ നിലനിര്‍ത്താനായില്ല. ഡല്‍ഹി ഡൈനാമോസിന്റെ ആന്‍ഡ്രിയ കലുഡെറോവിച്ച് 84-ാം മിനിട്ടില്‍ ഹെഡറിലൂടെ ഗോള്‍ നേടി മത്സരം (1-1) സമനിലയില്‍ അവസാനിപ്പിച്ചു. ഇതോടെ രണ്ടാം ഹോംമാച്ചിലും വിജയം പ്രതീക്ഷിച്ച മഞ്ഞപ്പടയുടെ ആരാധകര്‍ നിരാശരായി.