കൃഷ്ണഗിരി(വയനാട്): അണ്ടര്‍ 16 വിജയ് മര്‍ച്ചന്റ് ട്രോഫി ദേശീയ ക്രിക്കറ്റ് ടൂര്‍ണമെന്റില്‍ കേരളത്തിനെതിരേ ആന്ധ്ര ഭേദപ്പെട്ട നിലയില്‍. ആദ്യദിനം കളി അവസാനിപ്പിക്കുമ്പോള്‍ നാലു വിക്കറ്റ് നഷ്ടത്തില്‍ 208 റണ്‍സ് എന്ന നിലയിലാണ് ആന്ധ്ര. ടോസ് നേടിയ കേരളം ആന്ധ്രയെ ബാറ്റിങ്ങിനയക്കുകയായിരുന്നു. ആന്ധ്രക്കായി രേവന്ത് റെഡ്ഡി (57), എസ്.കെ റഷീദ് (53) എന്നിവര്‍ അര്‍ധ സെഞ്ചുറി നേടി. 53 റണ്‍സുമായി റഷീദും 23 റണ്‍സുമായി എസ്.കെ ഭാജിയുമാണ് ക്രീസില്‍.
ക്യാപ്റ്റന്‍ എം. സൂര്യകിരണ്‍ (15), കെ.എസ് രാജു (47), എം. ഹേമന്ത് റെഡ്ഡി (15) എന്നിവരാണ് നേരത്തെ പുറത്തായത്. കേരളത്തിനായി സുധി അനില്‍ മൂന്നും അഭി ബിജു ഒരു വിക്കറ്റും നേടി. കരുതലോടെയാണ് ആന്ധ്രയുടെ താരങ്ങള്‍ ബാറ്റു വീശിയത്. സ്‌കോര്‍ 85ല്‍ നില്‍ക്കെയാണ് ആന്ധ്രയുടെ ആദ്യ വിക്കറ്റ് വിണത്. ക്യാപ്റ്റന്‍ സൂര്യ കിരണ്‍, ഹേമന്ത് റെഡ്ഡി എന്നിവരുടെ വിക്കറ്റുകള്‍ പെട്ടെന്ന് നഷ്ടമായെങ്കിലും പിന്നീട് ക്രീസില്‍ ഒരുമിച്ച റഷീദും ഭാജിയും സ്‌കോര്‍ പതിയെ ഉയര്‍ത്തുകയായിരുന്നു. അഭിഷേക് ജെ. നായര്‍, സുധി അനില്‍, ഷോണ്‍ റോജര്‍, എസ്.എസ് ഷാരോണ്‍, ആര്‍. ആകാശ്, പി. റിയ ബഷീര്‍, നിരഞ്ജന്‍ വി. ദേവ്, മോഹിത് ഷിബു, അഭി ബിജു, വരുണ്‍ നായനാര്‍, രോഹന്‍ നായര്‍ എന്നിവരാണ് കേരളത്തിനായി കളത്തിലുള്ളത്.