മോസ്‌കോ: ആണവായുധ നിയന്ത്രണ കരാറില്‍ നിന്നുള്ള യു.എസിന്റെ പിന്മാറ്റം ലോകത്തെ കൂടുതല്‍ അപകടത്തിലേക്ക് നയിക്കുമെന്ന് റഷ്യയുടെ മുന്നറിയിപ്പ്. ഇത്തരത്തിലുള്ള ശ്രമം അപകടകരമാണെന്നും കരാറിലെ വ്യവസ്ഥകള്‍ പാലിക്കാന്‍ റഷ്യ തയാറാണെന്നും പ്രസിഡന്റ് വ്‌ളാദ്മിര്‍ പുടിന്റെ വക്താവ് ദിമിത്രി പെസ്‌കോവ് പറഞ്ഞു.
കരാറിനെ തകര്‍ക്കാന്‍ യു.എസ് നേരത്തെയും ശ്രമങ്ങള്‍ നടത്തിയിട്ടുണ്ട്. ഉടമ്പടയില്‍ നിന്നുള്ള പിന്‍വാങ്ങാനുള്ള യു.എസ് നീക്കം ആശങ്കയുണ്ടാക്കുന്നതാണ്. ആണവായുധ ആക്രമണം നടത്തുമെന്ന് യു.എസ് ഭീഷണിപ്പെടുത്തുകയാണെങ്കില്‍ തങ്ങള്‍ ആദ്യം ആക്രമണം നടത്തില്ലെന്ന് പെസ്‌കോവ് പറഞ്ഞു. 1987ല്‍ ധാരണയിലെത്തിയ കരാറിലെ വ്യവസ്ഥകള്‍ റഷ്യ ലംഘിച്ചുവെന്നുള്ള യു.എസ് വാദങ്ങളെ അദ്ദേഹം നിരസിച്ചു.
അതിനിടെ യു.എസ് സുരക്ഷാ ഉപദേശകന്‍ ജോണ്‍ ബാള്‍ട്ടന്റെ റഷ്യന്‍ പര്യടനം ആരംഭിച്ചു. ആണവ കരാറില്‍ നിന്ന് പിന്‍വാങ്ങുന്നതിലെ അന്തിമ തീരുമാനം അദ്ദേഹത്തിന്റെ സന്ദര്‍ശനം പൂര്‍ത്തീകരണത്തോടെയുണ്ടാകും. റഷ്യയുടെ ഉന്നത പ്രതിനിധികളുമായി അദ്ദേഹം കൂടിക്കാഴ്ച നടത്തുമെങ്കിലും പ്രസിഡന്റ് വ്‌ളാദ്മിര്‍ പുടിനെ കണ്ടുമുട്ടില്ല.
ശീതയുദ്ധകാലത്ത് യു.എസും റഷ്യയും തമ്മില്‍ ധാരണയിലെത്തിയ ആണവ കരാറില്‍ (ഐ.എന്‍.എഫ്) നിന്ന് പിന്‍വാങ്ങുമെന്നാണ് യു.എസ് പ്രസിഡന്റ് ഡൊണാള്‍ഡ് ട്രംപ് കഴിഞ്ഞ ദിവസം അറിയിച്ചത്. റഷ്യയുടെ ഭാഗത്തുനിന്ന് കരാര്‍ ലംഘനമുണ്ടായെന്ന് ചൂണ്ടിക്കാട്ടിയാണ് യു.എസിന്റെ മുന്നറിയിപ്പ്. മുന്‍ യു.എസ് പ്രസിഡന്റ് റൊനാള്‍ഡ് റീഗണും സോവിയറ്റ് നേതാവ് മിഖായെല്‍ ഗോര്‍ബച്ചേവും തമ്മില്‍ 1987ല്‍ ആണ് കരാറില്‍ ഒപ്പുവച്ചത്.
കാരാറിലെ ധാരണയനുസരിച്ച് ഹ്രസ്വ, ദീര്‍ഘദൂര ആണവായുധങ്ങളുടെ ഉപയോഗവും നിര്‍മാണവും ഒഴിവാക്കാന്‍ തീരുമാനിച്ചിരുന്നു. ഐ.എന്‍.എഫ് ഉടമ്പടിയിലെ തീരുമാനങ്ങള്‍ റഷ്യ ലംഘിക്കുന്നുണ്ടെന്ന് 2014ല്‍ ബറാക് ഒബാമ ആരോപിച്ചിരുന്നു. എന്നാല്‍ യൂറോപ്യന്‍ യൂനിയന്റെ സമ്മര്‍ദത്തെ തുടര്‍ന്ന് ഉടമ്പടിയില്‍നിന്ന് പിന്‍വാങ്ങാന്‍ അദ്ദേഹം തയാറായില്ല.
കരാറില്‍ നിന്നുള്ള പിന്‍മാറ്റം ലോകത്ത് വീണ്ടും ആയുധ മത്സരത്തിലേക്ക് നയിക്കുമെന്നായിരുന്നു യൂനിയന്റെ വിലയിരുത്തല്‍. മധ്യദൂര മിസൈലായ എസ്.എസ്.സി നിര്‍മാണത്തോടെ റഷ്യ കരാര്‍ ലംഘിച്ചുവെന്നാണ് യു.എസ് ആരോപണം. നാറ്റോ രാജ്യങ്ങളിലേക്ക് ആണവാക്രമണങ്ങള്‍ നടത്താന്‍ ഇതിലൂടെ സാധ്യമാവും. ഈ മിസൈല്‍ സംബന്ധിച്ചുള്ള കൂടുതല്‍ വിവരങ്ങള്‍ പുറത്തുവിടാന്‍ റഷ്യ തയാറായില്ല.