കോഴിക്കോട്: 'വഹാബിസം പരിണാമങ്ങളുടെ വര്‍ത്തമാനം' എന്ന ശീര്‍ഷകത്തില്‍ 25ന് കോഴിക്കോട് ടൗണ്‍ഹാളില്‍ നടക്കുന്ന ആദര്‍ശ സമ്മേളനത്തിന് എസ്.വൈ.എസ് സംസ്ഥാന സെക്രട്ടേറിയറ്റ് യോഗം അന്തിമ രൂപം നല്‍കി. രാവിലെ ഒന്‍പത് മണിക്ക് സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. എസ്.വൈ.എസ് സംസ്ഥാന ജനറല്‍ സെക്രട്ടറി സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി അധ്യക്ഷനാവും. സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തും.
എം.ടി അബൂബക്കര്‍ ദാരിമി(ഇസ്‌ലാമിലെ ഏകദൈവ വിശ്വാസം), മുസ്തഫ അശ്‌റഫി കക്കുപടി(മുജാഹിദ് തൗഹീദ് 1921, 2001, 2007, 2012, 2018), അബ്ദുസ്സമദ് പൂക്കോട്ടൂര്‍(നവോത്ഥാനം, അവകാശികളും വാദികളും), അബ്ദുല്‍ഹമീദ് ഫൈസി അമ്പലക്കടവ്(സ്ത്രീ പള്ളിപ്രവേശം), അലവി ദാരിമി കുഴിമണ്ണ(വൈരുധ്യങ്ങളുടെ നേര്‍ക്കാഴ്ചകള്‍) വിഷയമവതരിപ്പിക്കും. ശരീഅത്ത് സമ്മേളനത്തിന്റെ ഭാഗമായി മഹല്ലുകളില്‍ നടത്തിയ ഒപ്പുശേഖരണം സമാഹരിച്ച് രാഷ്ട്രപതിക്ക് സമര്‍പ്പിക്കാന്‍ തീരുമാനിച്ചു.
'തിരുനബി അനുപമ വ്യക്തിത്വം' എന്ന പ്രമേയത്തില്‍ നടത്തുന്ന നബിദിന കാംപയിനിന്റെ സംസ്ഥാനതല ഉദ്ഘാടനം നവംബര്‍ എട്ടിന് പാണക്കാട്ട് വച്ചും സമാപന സമ്മേളനം തിരുവനന്തപുരത്തും നടത്താന്‍ തീരുമാനിച്ചു. കാംപയിനിന്റെ ഭാഗമായി നവംബര്‍ ഏഴിനു ജില്ലാതലങ്ങളില്‍ വിളംബര റാലികള്‍ സംഘടിപ്പിക്കും. പി.കെ ഇമ്പിച്ചിക്കോയ തങ്ങള്‍ അധ്യക്ഷനായി. സയ്യിദ് മുഹമ്മദ്‌കോയ തങ്ങള്‍ ഉദ്ഘാടനം ചെയ്തു. മെട്രോ മുഹമ്മദ് ഹാജി, മലയമ്മ അബൂബക്കര്‍ ബാഖവി, അബ്ദുസ്സമദ് പൂക്കോട്ടൂര്‍, മുസ്തഫ മുണ്ടുപാറ, നാസര്‍ ഫൈസി കൂടത്തായി, എ.എം പരീത് എറണാകുളം, ഒ.എം ശരീഫ് ദാരിമി, പുത്തനഴി മൊയ്തീന്‍ ഫൈസി, അബ്ദുറഹ്മാന്‍ മുസ്‌ലിയാര്‍ കൊടക്, സലീം എടക്കര, ഹംസ റഹ്മാനി കൊണ്ടിപ്പറമ്പ്, എ.എം ശരീഫ് ദാരിമി നീലഗിരി, പി.എം ലത്തീഫ് ഹാജി ബംഗളൂരു, ഹസന്‍ ആലംകോട് എന്നിവര്‍ സംബന്ധിച്ചു. കെ. മോയിന്‍കുട്ടി മാസ്റ്റര്‍ നന്ദി പറഞ്ഞു.