ഇന്ന് ആദ്യം എത്തുക ലക്ഷദ്വീപില്‍ നിന്നുള്ള ഹാജിമാര്‍
നെടുമ്പാശേരി: സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ ഹജ്ജ് കര്‍മം കഴിഞ്ഞ് മടങ്ങി വരുന്ന ഹാജിമാരെ സ്വീകരിക്കാന്‍ നെടുമ്പാശേരി ഒരുങ്ങി. ഇന്ന് രാവിലെ 9.30 നാണ് ഹാജിമാരെയും വഹിച്ചുകൊണ്ടുള്ള ആദ്യ എയര്‍ ഇന്ത്യ വിമാനം നെടുമ്പാശേരിയിലെത്തുക. ലക്ഷദ്വീപില്‍ നിന്നുള്ള തീര്‍ഥാടകരാണ് ആദ്യ വിമാനത്തില്‍ എത്തുക. 331 പേരാണ് ലക്ഷദ്വീപില്‍ നിന്നും യാത്രയായിരുന്നത്. രണ്ടാമത്തെ വിമാനം വൈകിട്ട് മൂന്നിന് എത്തും. ഹാജിമാരുടെ മടക്കവുമായി ബന്ധപ്പെട്ട് രണ്ടാംഘട്ട ഹജ്ജ് ക്യാംപിന്റെ പ്രവര്‍ത്തനങ്ങള്‍ ഇന്നലെ ആരംഭിച്ചു. വിമാനത്താവളത്തോട് ചേര്‍ന്ന സിയാല്‍ അക്കാദമിയിലാണ് രണ്ടാം ഘട്ട ക്യാംപിനുള്ള പ്രാഥമിക സൗകര്യങ്ങള്‍ ഒരുക്കിയിരിക്കുന്നത്. ക്യാംപിന്റെ പ്രവര്‍ത്തനങ്ങള്‍ക്കായി ഹജ്ജ് സെല്‍ അംഗങ്ങളും വളണ്ടിയര്‍മാരും ഇതിനകം തന്നെ സിയാല്‍ അക്കാദമിയില്‍ എത്തിയിട്ടുണ്ട്. 2749 പേരാണ് സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ നെടുമ്പാശേരിയില്‍ നിന്നും യാത്രയായിരുന്നത്. മടക്ക യാത്രയ്ക്ക് നാല് ദിവസങ്ങളിലായി എട്ട് വിമാനങ്ങളാണ് ഷെഡ്യൂള്‍ ചെയ്തിരിക്കുന്നത്.