തിരുവനന്തപുരം: കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രനെതിരേ നിയമ നടപടിയെടുക്കാന്‍ ഡി.ജി.പിക്ക് സര്‍ക്കാര്‍ അനുമതി. ഡി.ജി.പി സി.പി.എം ബ്രാഞ്ച് സെക്രട്ടറിയെപ്പോലെ പ്രവര്‍ത്തിക്കുന്നെന്ന പ്രസ്താവനയിലാണ് മുല്ലപ്പള്ളിക്കെതിരേ നിയമ നടപടിയെടുക്കാന്‍ ഡി.ജി.പി ലോക്‌നാഥ് ബെഹ്‌റക്കു സര്‍ക്കാര്‍ അനുമതി നല്‍കിയത്.
മാനനഷ്ടക്കേസ് നല്‍കാന്‍ ആഭ്യന്തര വകുപ്പാണ് ഡി.ജി.പിക്കു അനുമതി നല്‍കിയത്. ഡി.ജി.പിയുടെ അപേക്ഷ അംഗീകരിച്ചാണു നടപടി.
പോസ്റ്റല്‍ ബാലറ്റ് ഉപയോഗിക്കുന്ന പൊലിസുകാരുടെ വിവരങ്ങള്‍ ശേഖരിക്കാന്‍ ആവശ്യപ്പെടുന്ന സര്‍ക്കുലറിന്റെ പേരിലാണു മുല്ലപ്പള്ളി ഡി.ജി.പിയെ വിമര്‍ശിച്ചത്. കഴിഞ്ഞ ഏപ്രില്‍ 14നു മാധ്യമങ്ങളിലൂടെ നടത്തിയ പ്രതികരണങ്ങളില്‍ ഡി.ജി.പി ലോക്‌നാഥ് ബെഹ്‌റ സി.പി.എം ബ്രാഞ്ച് സെക്രട്ടറിയെ പോലെയാണു പ്രവര്‍ത്തിക്കുന്നതെന്ന് മുല്ലപ്പള്ളി രാമചന്ദ്രന്‍ പലകുറി ആരോപിച്ചിരുന്നു. ഇത് സര്‍ക്കാര്‍ ജീവനക്കാരനും ഉത്തരവാദപ്പെട്ട സ്ഥാനത്തിരിക്കുന്നതുമായ വ്യക്തിയായ തനിക്ക് മാനഹാനിയുണ്ടാക്കുന്നതാണെന്ന് ചൂണ്ടിക്കാട്ടി ഡി.ജി.പി സര്‍ക്കാരിനു കത്തുനല്‍കിയിരുന്നു.
മുല്ലപ്പള്ളിയുടെ ഈ പരാമര്‍ശം പൊലിസ് സേനയുടെ മനോവീര്യം തകര്‍ക്കുന്നതാണെന്നും മുല്ലപ്പള്ളിക്കെതിരേ പ്രോസിക്യൂഷന്‍ നടപടി സ്വീകരിക്കാന്‍ അനുമതി നല്‍കണമെന്നായിരുന്നു ഡി.ജി.പി ആവശ്യപ്പെട്ടിരുന്നത്.