ന്യൂ ഡല്‍ഹി: ഐ.എസ്.എല്ലില്‍ കഴിഞ്ഞ ദിവസം നടന്ന ഡല്‍ഹി ചെന്നൈയിന്‍ മത്സരം സമനിലയില്‍ കലാശിച്ചു. ഇരു ടീമുകളും ആദ്യ ജയത്തിന് വേണ്ടിയാണ് ഇറങ്ങിയതെങ്കിലും ജയം മാത്രം സ്വന്തമാക്കാന്‍ രണ്ട് ടീമുകള്‍ക്കുമായില്ല. സമനില പിടിച്ചതോടെ സീസണിലെ ആദ്യ പോയിന്റും ചെന്നൈയിന്‍ സ്വന്തമാക്കി. ഇതിന് മുമ്പുള്ള മൂന്ന് മത്സരങ്ങളിലും ചെന്നൈയിന് തോല്‍വിയായിരുന്നു. ഡല്‍ഹിക്കും ഇതുവരെ ജയിക്കാനായിട്ടില്ല. നാലു മത്സരങ്ങളില്‍ ഒരു തോല്‍വിയും മൂന്ന് സമനിലയുമാണ് ഡല്‍ഹിയുടെ സമ്പാദ്യം. മൂന്ന് പോയിന്റുമായി എട്ടാം സ്ഥാനത്താണ് ഡല്‍ഹിയുള്ളത്. ചെന്നൈയിനും പൂനെ സിറ്റിയുമാണ് ഡല്‍ഹിക്ക് താഴെയായുള്ളത്.
മികച്ച പ്രകടനമാണ് കളിയിലുടനീളം ചെന്നൈയിന്‍ കാഴ്ചവച്ചത്. ജയത്തിനു വേണ്ടണ്ടി ചെന്നൈയിന്‍ കൈ മെയ് മറന്ന് പൊരുതിയെങ്കിലും ഡല്‍ഹി ഗോള്‍ കീപ്പര്‍ ഡൊറാണ്‍സോറോയെ കീഴ്‌പ്പെടുത്താനായില്ല. ഗോളെന്നുറച്ച ചെന്നൈയുടെ നിരവധി ശ്രമങ്ങളാണ് ഡല്‍ഹി ഗോള്‍ കീപ്പര്‍ വിഫലമാക്കിയത്. കളിയുടെ തുടക്കം മുതല്‍ തകര്‍പ്പന്‍ ഫോമിലായിരുന്ന ഡൊറോണ്‍സോറോയാണ് ഡല്‍ഹിയെ തോല്‍വിയില്‍ നിന്ന് രക്ഷിച്ചത്.