ജിദ്ദ: 27 വര്‍ഷത്തെ പ്രവാസം അവസാനിപ്പിച്ച് നാട്ടിലേക്ക് മടങ്ങുന്ന റുവൈസ് ഏരിയ കെ.എം.സി.സി മുന്‍ പ്രസിഡന്റും നിലവിലെ ചെയര്‍മാനുമായ ചെമ്പന്‍ അബ്ദു ഹാജിക്ക് റുവൈസ് ഏരിയ കെ.എം.സി.സി യാത്രയയപ്പു നല്‍കി. റുവൈസ് മലബാരി റെസ്റ്റോറന്റ് ഓഡിറ്റോറിയത്തില്‍ നടന്ന പരിപാടി ജിദ്ദ സെന്‍ട്രല്‍ കമ്മിറ്റി ആക്റ്റിംഗ് പ്രസിഡന്റ് വി.പി മുസ്ഥഫ ഉദ്ഘാടനം ചെയ്തു.

ആധുനിക സൗകര്യങ്ങളൊന്നും ഇല്ലാതിരുന്ന കാലത്ത് റുവൈസില്‍ സാധാരണക്കാര്‍ക്കിടയില്‍ ഇറങ്ങിച്ചെന്നു സംഘടനാ പ്രവര്‍ത്തനം നടത്തിയ അബ്ദു ഹാജിയുടെ പ്രവര്‍ത്തനങ്ങള്‍ ശ്ലാഘനീയമാണെന്നും ഏവര്‍ക്കും മാതൃകയാണെന്നും അദ്ദേഹം പറഞ്ഞു. റുവൈസ് ഏരിയ കെഎംസിസി യുടെ ഉപഹാരം കെഎംസിസി സെന്‍ട്രല്‍ കമ്മിറ്റി ജനറല്‍ സെക്രട്ടറി അബുബക്കര്‍ അരിമ്പ്ര അബ്ദു ഹാജിക്ക് സമ്മാനിച്ചു.

ആക്റ്റിംഗ് പ്രസിഡന്റ് സയ്യിദ് മുഹ്ദാര്‍ തങ്ങള്‍ പരിപാടിയില്‍ അധ്യക്ഷത വഹിച്ചു. അബുബക്കര്‍ അരിമ്പ്ര, മജീദ് ഷൊര്‍ണ്ണൂര്‍, ഷൗക്കത്ത് ഒഴുകൂര്‍ , മുഹമ്മദ് കല്ലിങ്ങല്‍ സംസാരിച്ചു. അബ്ദു ഹാജി മറുപടി പ്രസംഗം നടത്തി. ജിദ്ദയില്‍ വാട്ടര്‍ ടാങ്കില്‍ വീണു മരിച്ച ഹംസയുടെ മക്കളുടെ വിവാഹ ആവശ്യാര്‍ഥം കെഎംസിസി സെന്‍ട്രല്‍ കമ്മിറ്റി സമാഹരിക്കുന്ന ഫണ്ടിലേക്ക് റുവൈസ് കെഎംസിസി പ്രവര്‍ത്തകരുടെ സംഭാവന ഉത്ഘാടനം നാസര്‍ കോഡൂര്‍ സയ്യിദ് മുഹ്ദാര്‍ തങ്ങള്‍ക്കു നല്‍കി നിര്‍വഹിച്ചു. ഹൈദര്‍ ദാരിമി തുവ്വൂര്‍ പ്രാര്‍ത്ഥന നടത്തി. റുവൈസ് ഏരിയ കെഎംസിസി ജനറല്‍ സെക്രട്ടറി റഫീഖ് പന്താരങ്ങാടി സ്വാഗതവും ട്രെഷറര്‍ കെ.എന്‍.എ. ലത്തീഫ് നന്ദിയും പറഞ്ഞു. കെഎംസിസി ഭാരവാഹികളായ മുഹമ്മദലി പന്താരങ്ങാടി, മുസ്തഫ ആനക്കയം, ഷഫീഖ് പൊന്നാനി, സലീം കരിപ്പോള്‍ തുടങ്ങിയവര്‍ പരിപാടിക്ക് നേതൃത്വം നല്‍കി.