കോഴിക്കോട്: ശനിയാഴ്ച നടക്കുന്ന ഐ ലീഗ് മത്സരങ്ങള്‍ക്കായി മോഹന്‍ ബഗാന്‍ ടീം കോഴിക്കോട്ടെത്തി.
ടീമിന് ഗോകുലം എഫ്.സി അധികൃതര്‍ സ്വീകരണം നല്‍കി. നാളെ തുടങ്ങുന്ന ഐ ലീഗിലെ രണ്ടാം മത്സരത്തില്‍ ഗോകുലവുമായി ഏറ്റുമുട്ടാനാണ് ബഗാന്‍ കോഴിക്കോട്ടെത്തിയിട്ടുള്ളത്. ശനിയാഴ്ച വൈകിട്ട് അഞ്ചിനാണ് ബഗാനും ഗോകുലവും തമ്മിലുള്ള മത്സരം. ബഗാന്‍ ടീം ഇന്ന് വൈകിട്ട് കോര്‍പ്പറേഷന്‍ സ്റ്റേഡിയത്തില്‍ പരിശീലനത്തിനിറങ്ങും. കേരളത്തിന് സന്തോഷ് ട്രോഫി സമ്മാനിച്ച പരിശീലകനായ സതീവന്‍ ബാലന്‍ ഗോകുലം എഫ്.സിയുടെ സഹപരിശീലകനായി ചുമതലയേറ്റു. ആദ്യ സീസണ് ശേഷം പരിശീലകന്‍ ബിനോ ജോര്‍ജിനെ മാറ്റി വിദേശ പരിശീലകനെ ഗോകുലം പരീക്ഷിച്ചിരുന്നു. എന്നാല്‍ സൂപ്പര്‍ കപ്പില്‍ അമ്പേ പരാജയമായതു കാരണം സ്പാനിഷ് കോച്ചിനെ മാറ്റി വീണ്ടും ബിനോ ജോര്‍ജിനെതന്നെ സ്ഥാനം ഏല്‍പ്പിക്കുകയായിരുന്നു. സതീവന്‍ ബാലന്റെ വരവ് ടീമിന് ഗുണം ചെയ്യുമെന്നും യുവനിരയെ ഒരുക്കുന്നതില്‍ സമര്‍ഥനായ ബാലന്റെ വരവ് ടീമിന് ഗുണം ചെയ്യുമെന്നുമാണ് വിലയിരുത്തലുകള്‍.